Мегьарамдхуьруьн райондин Ярагъ-Къазмайрин хуьре 2017-йисуз мектебдин зурба дарамат эцигна куьтягьна. Алай йисан 1-сентябрдиз и мектебдиз аялар кIелиз физ гьазур жезва. Им хуьр ва район патал лишанлу вакъиа я.
1950-йисарилай инихъ Ярагъ-Къазмайрин аялар мектебдин пуд чкадал пай хьанвай куьгьне ва гъвечIи дараматра кIелунал машгъул тир. И мектебда чирвилер къачур хейлин ксарикай алимар, духтурар, муаллимар ва маса пешейрин иесияр хьанва.
Гила чун цIийи мектеб арадал атунал акъвазин. 2016-йис. 31-август. Мегьарамдхуьруьн район меркездай мугьманар кьабулиз гьазур хьана акъвазнавай. Югъ нисини жезвай. Дагъустан Республикадин образованидин ва илимдин министр Шагьабас Шагьов, ДГТУ-дин ректор, РД-дин Халкьдин Собранидин депутат Тагьир Исмаилов, Мегьарамдхуьруьн райондин кьил Фарид Агьмедов, райондин образованидин управленидин начальник Улубег Абейдуллаев Ярагъ-Къазмайрин юкьван мектебдиз мугьман хьана. Куьгьне мектебдин дараматра къекъвена, ахпа коллективда собрание тухвана. Инал вири мугьманар рахана. Абуру хуьре цIийи мектеб эцигун чарасуз герек тирди, тестикьарна.
Чи хуьруьнви, Дагъустан Республикадин машгьур журналист Алик Абдулгьамидовани уьлкведин Президент Владимир Владимирович Путиназ чи хуьре цIийи мектеб эцигунин патахъай суал ганай. Гуьгъуьнлай Москвада хьайи пресс-конференциядал Алик Абдулгьамидова вичин суал жаваб агакь тавуна амайди раижна ва мад тикрар хъувуна.
Мегьамед Ярагъидин фондунин председатель, хуьруьнви Гьажибуба Шихмурадович Рустамовни чи хуьре цIийи мектеб эцигунин къайгъуйрик хьана.
ЦIийи мектебдин дарамат эцигуник пай кутур вири стхайриз чна, хуьруьн агьалийри, муаллимри, мектебда кIелзавай вири аялри ва абурун диде-бубайри рикIин сидкьидай чухсагъул лугьузва. Къуй райондин ва республикадин кьиле акъвазнавай регьберрихъ чандин сагъвал хьурай, Аллагьди чпиз шад мярекатра иштиракдай къуватар гурай.
Чи цIийи мектебдин дараматда 325 аялдиз санлай чирвал ва тербия гудай мумкинвилер ва къулай шартIар яратмишнава. 180 аял санал гьакьдай столовой кардик ква, 280 аялдиз собранияр ва шад мярекатар тухудай актовый зал жуьреба-жуьре рангаралди безетмишнава, вири жуьре къугъунар кьиле тухудай еке спортзал кардик ква. Гьаятда теннис къугъвадай кьве майдан, волейбол, футбол, баскетбол ва маса къугъунар ийидай махсус чкаяр ава. ЦIийи мектебдин вилик гъвечIи аялривай гьар жуьредин къугъунар ийиз жедай чкаярни ква, мектебдихъ емишдин багъ гала, еке гьаятар цуькверивди безетмишнава. Ибур вири чи акьалтзавай несил патал тешкилнавай къулай шартIар тушни бес!
ЦIийи мектебда хъсандиз тадаракламишнавай 14 кабинет кардик ква. Анра компьютерар, интерактивный, маркердал ва мелдал кхьидай доскаяр, чими, къайи яд ва маса къулайвилер ава.
Чи муаллимар компьютердин, цIийи технологийрин жигьетдай савадлу авун патал Дагъустандин тежриба хкаждай институтдай чирвилер гуз пешекарар атана, муаллимриз курсар тухвана.
Кабинетра гзаф предметрай: урус чIалай ва литературадай, химиядай, биологиядай, ингилис чIалай, тарихдай, географиядай, физикадай, информатикадай, математикадай, ИЗО-дай, черченидай герек вири тадаракар, материалринни техникадин база ава. Технологиядин 3 кабинет кардик ква: тIуьнар гьазурдай, рушариз перемар цваз чирдай ва кIарасдин устIарвилер ийидай. Дидед чIалан ва эдебиятдин кабинетни лап кутугайди хьанва.
ЦIийи кIелунин йисуз ихьтин вири къулайвилер авай мектебдиз экъечIун фикирда кьуна, чна чи балайри хъсан чирвилер ва тербия къачудайдахъ инанмишвалзава. Ихьтин гуьрчег мектебда кIелун чи балайрин бахтлувал я.
Къуй абур Аллагьди чпин мурадрив агакьаррай!
М.Гь.Жаруллаева, дидед чIалан ва эдебиятдин муаллим, Ярагъ-Къазмайрин хуьр
