Мегьарамдхуьруьн райондин мектебра кIелзавай аялрин эсерар

Лезгияр

ГекъигайтIа миллетар,

ВикIегьбур я лезгияр.

Чан къурбандда Ватан хуьз

РикIер — михьи гуьзгуьяр!

 

КIири хуьруьн юкьвал ала,

Эсед хцин имарат.

Лезги викIегь рухвайри

Чан къурбандна дявейра.

 

Гьажи Давуд, Ярагъ Мегьамед

Къазимегьамед, Валентин Эмиров,

СтIал Сулейман, Гьамид Рустамов,

Чи халкьдин кьегьал рухваяр!

 

Вири тIварар жедач кхьиз

ТIал язава жуван рикIиз,

Гьар сад рикIе хуьх, лезгияр,

Лезги халкьар авур виниз.

 

Чи лезгийрин ужагъ я,

Диде Ватан — Дагъустан.

Лезгинкадал дамахиз,

Яшамишрай Лезгистан!

Амир Гьажибегов

Самур вацI

Гагь тIачунин ранг къвез, дакIваз, алахьиз,

Кьер дегишда, тухуз хура гьатайбур

Гагь элекьна вили ранг къвез авахьиз,

Жеда Самур диндирмишиз атайбур.

 

Багъишзава къван, къум, херхем-девлетар,

Къуй хкажрай лугьуз кIвалер, паруяр.

Багъишзава абукевсер шербетар,

Тухвана фад ацIуй лугьуз къубуяр.

 

Вуч хабар гва туьнт лепейрин баядрив,

Гагь эрчIи къвал, гагь чапла къвал гатазвай?

Зун хьиз, вунни агакьнавач мурадрив,

Хайи халкьдин тIал рикIеваз рахазвай.

 

Гагь вуна ранг, гагь вуна рехъ дегишиз,

Мус жеда вахъ са тайин чин, чан Самур?

Ви патав къвез мерд суфраяр къурмишиз,

Ава чи халкь, яд хъваз ширин, чан Самур.

 

Лианад там, къарасуяр надир тир,

РикI гьейрандай женнетдин пIипI, майдан я.

Таз хъфизвай къушарин муг  кишпирдин

Чими кIеме экIянавай игьсан я.

 

Къизилдин муьгъ бере хьиз я, ядай хеб,

Эл чухвазвай нефс тух тежер эмирри.

ДапIар алай чефте хьиз я, хьанвай деб,

Рехъ агал тир, пул тагузвай факъирриз.

 

Пишкешнава мугъулриз пай чилерин,

Часпардин зул тухуз асант хьуй  лугьуз.

Гьинва намус “ватанперес” кьилерин­,

Лезги лежбер авур куьлягь икI ажуз?

 

Ви лепейра гьахьняй ажугъ, хъел ава,

Кутурвиляй пай авунин тахсир вак.

Каспий патал шад хабаррин тел ава,

Миллет абад хьуникай тир фикир пак.

 

Вун шагьдамар, нефес я чи накьварин,

Багъ-бустанриз гузвай уьмуьр, хвеш вичин.

Ваз тIем гузва жив кьилеллай камари,

Авай мурад: гужлу авун сес, везин.

 

Инсанрин гъам, хажалатар аквазвай,

Вахъ шад макьам женни мегер, Самур вацI?

Са гьахъ-дуван, адалатар таквазвай,

РикIер хуррам женни мегер, Самур вацI?

 

Твах махлукьдин рикIевай гъам  акъудиз,

Кьер артухиз тухумир накьв,чилер чи.

Твах часпарар, ягъай симер алудиз,

Сад хъия халкь, умудлу я рикIер чи.

Саидагьмед Саидов

КIанда заз

КIанда уьмуьр дуьньяда

Вичихъ кьиникь галачир.

Муьгьуьббатни милайим

И кьил, а кьил авачир.

 

КIанда чими йикъар заз,

Алахьнавай цав михьи.

Гуьзел шартIар багъишна

ТIебиатди чаз вири.

 

КIанда михьи булахар,

ЦIару цуьквер, бахчаяр.

КIанда мани лугьуз заз

Уьмуьрдикай бахтавар.

 

КIанда Ватан, зи чан хьиз,

Жуван кIвал-югъ, хизанни.

КIанда, валлагь, дустарни,

Чуьлда авай цуьквер хьиз.

Фазила Ягъибегова

Инсандин мурад

Аваданвал Ватандин,

Михьи бине виждандин,

Хура рикI хьун асландин.

Мурад я гьар инсандин.

 

Берекат хьун гьар кIвале,

Инсаният — дуьз рекье,

Экуь къастар хьун рикIе.

Мурад я гьар инсандин.

 

Дяве, фитне тахьурай,

Чаз ислягьвал акурай!

Къуй хуьрерни шегьерар

Берекатрив ацIурай.

 

Бахтлу хьурай жегьилар,

Сагъламбур хьуй агьилар.

Даим шад хьун гуьгьуьлар

Мурад я гьар инсандин.

 

Инсанвал чи бине я,

Инсанвал лап вине я,

Намус, гъейрат, берекат,

Инсанвал хуьз гьерекат!

Абдул Максубов

И шиирар литературадин “РикI хъсанвилив ацIура” конкурсдин нетижада акъуднавай ктабдай къачунва.