КIвалахда къазанмишнавай агалкьунриз, вичин пешедиз къалурзавай вафалувилиз килигна, СтIал Сулейманан райондай тир физикадин муаллим Сабир Мейланов Дагъустан Рес­публикадин Кьил Сергей Ме­ликован патай Чухсагъулдин чарчиз ва «Иман» фондунин патай 100 агъзур манатдиз лайихлу хьанва. Идакай чаз райондин администрациядин пресс-къуллугъди хабар гана.

Акьалтзавай несилдиз тербияни чирвилер гунин карда­ муаллимдин зегьмет ва адан кIва­лахдин тафаватлувал къейд авуналди, яхцIурни кьуд йисан тежриба авай муаллимдив шабагь райондин кьил Саид Темирханова вахкана.

Малум хьайивал, ЦIийи­хуьруьн ва Цмуррин мектеб­рин машгьур муаллим­ Сабир Мейланован­ ученикри физикадайни математи­ка­­дай кьиле­ физвай жуьреба-жуь­ре олим­пиадайра­ агал­кьунар­ къазанмишзава­. Гаф кватай чкадал лу­гьун­ хьи, физикадин­ни ма­те­ма­тикадин илимрин докторвилин­ дережа къачунвай Россияда ви­ридалайни же­гьил алим Заур­ Алисултановни Сабир Пирметовичан виликан ученик тир.

С. Темирханова алава хъувурвал, Сабир Пирметович хьтин муаллимри образованидин хел еримлу авуник, жегьилриз чирвилер къачуз ва илимдиз итиж ийиз кIан хьунин тербия гуник еке пай кутазва. Ученикрик цIийи агалкьунар къачудай гьевес кутунай райондин регьберди муаллимдиз сагърай лагьана.

Чи мухбир