«Победа» авиакомпанияди алай йисан 1-октябрдилай Махачкъаладай Абу-Дабидиз дуьм-дуьз лув гудай самолетдин рейсер ачухдайвал я. «ТАСС» чешмеди хабар гузвайвал, Дагъустандай ОАЭ-диз самолет гьафтеда кьве сеферда фида: гьар саласадизни кишдиз. Инай аниз самолетди 3 сятни 10 декьикьада лув гуда.
Къейд ийин, алай вахтунда Абу-Дабидиз Москвадай гьафтеда 4 сеферда самолет физва — саласадиз, хемисдиз, кишдиз ва гьяддиз.
2021-йисан августдиз чи аэропортуна йисан муддатда 300 агъзурдав агакьна инсанриз къуллугъ ийидай мумкинвал гудай международный терминал ачухнай. Виликан терминалдив гекъигайла, цIийида мумкинвилер пуд сеферда артухарнава. Анай Россиядин жуьреба-жуьре шегьерриз рейсер кьилиз акъудзава, гьа жергедай яз Москвадиз, Санкт-Петербургдиз, Казандиз, Сочидиз, Екатеринбургдиз, Томскдиз, Новокузнецкдиз, Нижневартовскдиз Челябинскдиз, Ижевскдиз, Самарадиз, Саратовдиз, Оренбургдиз, Сургутдиз, Красноярскдиз, Тюмендиз, Кировдиз ва Пермдиз.
«ЛГ»
