Алатай гьафтеда меркезда, “Президент-комплексдин” дараматда, Имам Шамилан 225 йис тамам хьунин юбилейдиз талукьарнавай илимдин конференция кьиле фена.
Ам ачухдайла, РД-дин милли сиясатдин ва диндин крарин рекьяй министр Энрик Муслимова лагьана: “Йисар гьикьван тарихдиз фейитIани, Дагъустандин ва Чечнядин имам хьайи Шамила дагъвийрин азадвал, аслу туширвал къазанмишун патал авур алахъунрин, зегьметдин метлеб квадар тежедайди я. Вири дуьньяда тIвар акъатай, азадвилин женгинин кьиле акъвазай касдин гьерекатриз, крариз алатай вахтара жуьреба-жуьре къиметар гана. Адан кар пислемишайбурни, адак квачир синихар кутурбурни хьана. Ни вуч лагьайтIани, ада тарихда вичин тIвар туна, зурба арифдар, шейх Ярагъ Мегьамеда хкажай азадвилин пайдахдик кваз уьмуьр тухвана”.
Мярекатда РД-дин Халкьдин Собранидин Председателдин заместитель Саидагьмед Агьмедова, культурадинни тарихдин “Имам Шамилан фонд” обществодин президент Алиасгьаб Хархачева, тарихдин илимрин доктор, милли хатасузвилин стратегиядин институтдин директор Рустам Ибрагьимова, алимри, жемиятдин организацийрин, СМИ-рин векилри, студентри иштиракна.
— Имам Шамила Дагъустандин халкьар сад авунин ва абурун азадвал хуьнин карда еке роль къугъвана,- лагьана С. Агьмедова.- Гьа чIавара дагъвийри чеб са халкь, руьгьдин, яшайишдин, тарихдин са ивиррин сагьибар яз гьисабзавай. Дагъларин уьлкведин тарихда игитвилин гзаф вакъиаяр ва викIегь, къагьриман инсанар хьана. Имам Шамилни абурукай сад тир.
Р. Ибрагьимова эхиримжи йисара дуьньядин, Россиядин ва республикадин архиврай жагъай делилрин, материалрин бинедаллаз Чечнядин ва Дагъустандин имамдин уьмуьрдиз, женгиниз, Урусатдин пачагьдиз муьтIуьгъ хьуниз талукь цIийи малуматар раижна. Ада лагьайвал, Шамила Кавказдин халкьар Имаматда сад авуна, абуруз ислягьвал, Урусатдин халкьарихъ галаз дуствал хуьниз эвер гана. Адан тарсари ва тарихдин вакъиайри чаз къе куьмекзава. Шамилан девирдилай гуьгъуьниз дагъустанвийри лап четин, хаталу йисара чпин садвал къалурна.
Хийир Эмиров
