Мегьарамдхуьруьн райондин ЦIийихуьре (Новоаул) Украинада кьиле тухузвай махсус серенжемда телеф хьайи аскер Фарид Исаеван тIварунихъ куьче ягъуниз ва мемориалдин кьул ачухуниз талукь мярекат кьиле фена. Телеф хьайидалай кьулухъ Ф.Исаеваз “Жуьрэтлувилин” орден ганва.
И мярекатда Россиядин ФСБ-дин Дагъустанда авай сергьятдин управленидин начальник, генерал-лейтенант Андрей Карпенкоди, РД-дин Гьукуматдин Председателдин заместитель Рамазан Жафарова, Мегьарамдхуьруьн райондин администрациядин кьил Фарид Агьмедова, адан заместителри, аскердин мукьва-кьилийри, райондин собранидин депутатри ва масабуру иштиракна.
Мемориалдин кьул дирибаш аскер яшамиш хьайи кIвалин цлал алкIурна. Ана адан уьмуьрдин юлдаш гъвечIи пуд аялни галаз яшамиш жезва.
— Чун вили, ислягь цавун кIаник яшамиш хьун патал Фарид Исаева вичин чан къурбандна, — лагьана Андрей Карпенкоди. — Ахьтин рухваяр чна садрани рикIелай алуддач.
Рамазан Жафарова вичин рахунра викIегь хва тербияламишай диде-бубадиз сагърай лагьана ва къейдна: “Фарид Исаев халис къагьриман хьиз телеф хьана. Зун инанмиш я, адан кар маса аскерри, адахъ галаз къуллугъ авур юлдашри давамарда”.
— Ватандин вилик буржи викIегьвилелди, намуслувилелди кьилиз акъудзавай ихьтин рухваяр райондай акъатунал чна дамахзава. Чун неинки ам рикIел хуьниз, гьакI адан хизандиз вири ре-кьерай куьмек гунизни мажбур я, — лагьана Фарид Агьмедова.
***
13-сентябрдиз Мегьарамдхуьруьн райондин кьил Фарид Агьмедова СВО-да иштиракзавай аскеррихъ ва ана телеф хьайибурун хизанрихъ галаз гуьруьш кьиле тухвана. Идакай Ф.Агьмедован “Вконтакте” сетда авай чина хабар ганва.
ДНР-дин ва ЛНР-дин агьалияр хуьнин военный махсус серенжемда викIегьвални дурумлувал къалурунай са жерге аскеррив гьуьрметдин грамотаяр вахкана ва Ватандиз вафалувилелди къуллугъ авунай абуруз сагърай лагьана. Къейд авурвал, райондин патай гьамиша куьмекдик умуд кутаз жеда.
“Чи вилик РД-дин Кьил Сергей Меликова аскерриз, абурун багърийриз мумкин тир вири куьмекар гунин тапшуругъ эцигнава”, — кхьенва чешмеда.
СВО-да телеф хьайи Малик Мегьамедован, Самур Шагьмарданован ва Жамирзе Сафаралиеван хизанрив викIегьвилин орденар вахкана.
«Лезги газет»
