РД-дин регион идара ийидай центради (ЦУР) алай йисан 12-августдилай 11-сентябрдалди дуьздал акъудай месэлаяр нубатдин сеферда 12-сентябрдиз РД-дин Кьилин ва Гьукуматдин Администрациядин регьбер Алексей Гьасанован регьбервилик кваз веревирдна.
ЦIийи агьвалатар, месэлаяр веревирддалди вилик иштиракчийри алатай совещанидин нетижайрай кьабулай къарарар тамамаруникай малуматрихъ яб акална. ИкI, ЦУР-дин регьбер Мегьамедсултан Абдуралимова ихтилатайвал, РД-дин тIебиатдин ресурсрин ва экологиядин министерстводин, Гуниб райондин кьиле авайбурун ва жемиятдин умуми къуватралди Согратль хуьре зирзибилар тухунин месэла гьялна.
ГьакIни зирзибилрин хъуртарал цIаяр кьунин дуьшуьшар арадай акъудунихъ, республикадин са жерге районра кардик акатнавай къанунсуз карьеррихъ галаз алакъалу месэлаяр гьялунин жигьетдай серенжемар кьабулнава.
Бязи хуьрера авай муькъвер чкIизвай гьалда ава лугьуз, агьалийри шикаятзава. Ахцегь райондин Хкемрин хуьре авай куьгьне муьгъни ремонт хъувуна кIанибурукай я. Совещанидал малум хьайивал, тIвар кьунвай муьгъ тамамдиз цIийи хъийидай къарар кьабулнава.
Махачкъаладин Ленинкент поселокдин цин месэла республикадин инвестицийрин программадин сергьятра аваз гьялда.
Агьалийри Дербентда медицинадин тади куьмекдин улакьар бес тежезвайдакайни хабар ганвай. И жигьетдай РД-дин здравоохраненидин министерстводи югъди-йифди кIвалахдик жедай 4 кабинет кардик кутунвайдакай малумарна. 2021-йисуз Дербентдин районрин тади куьмекдин уртах станция цIийи 16 реанимобилдалди гегьеншар хъувунай. Алай вахтунда станциядихъ 21 машин ава. Станциядиз мад цIийи улакьар гунин месэладиз цIинин йисузни килигдайвал я.
12-августдилай 11-сентябрдалди ЦУР агьалийрин 6 агъзурдалай виниз арзайриз килигна. Абур асул гьисабдай электричество, къайи яд тахьунихъ, зирзибилар тухунин кар гьял тавунихъ ва рекьер ремонтунихъ галаз алакъалубур я. М. Абдуралимова къейд авурвал, гзафни-гзаф арзаяр Махачкъала, Буйнакск, Каспийск, Дербент шегьеррай, Хасавюртдин ва Буйнакскдин районрай атанвай.
Совещанидал здравоохраненидиз, медениятдин ирсинин объектар хуьниз, диде-буба кьилел алачирбуруз кIвалер гуниз ва маса хилериз талукь месэлаяр веревирдна. Эхирдай А.Гьасанова жавабдар вири органриз дуьздал акъуднавай четин месэлаяр гьялун патал тапшуругъар гана.
Чи мухбир
