И йикъара ДГУ-дин прикладной математикадин кафедрадин доцент, физикадинни математикадин илимрин кандидат, Дагъустандин образованидин лайихлу къуллугъчи, “Лезги газетдин” дустарикай тир Ветлугин Жабраилович Бейбалаева 55 йисан юбилей къейдна.
1967-йисан 3-октябрдиз Кьурагь райондин КьепIиррин хуьре дидедиз хьайи ам, юкьван мектеб акьалтIарайдалай кьулухъ, ДГУ-дин математикадин факультетдик экечIна. СССР-дин Яракьлу Къуватрин жергейра къуллугъна хтайдалай кьулухъ В.Бейбалаева университетда кIелун давамар хъувуна. 1993-йисуз ада вири предметрай вадар аваз вуз акьалтIарна. Гьа йисалай инихъ кьепIирвиди ДГУ-дин прикладной математикадин кафедрада зегьмет чIугвазва.
2009-йисуз Ветлугин Бейбалаева агалкьунралди илимрин кандидатвилин диссертация хвена, 2012-йисуз адакай кафедрадин доцент хьана. Алимдин къелемдикай 100-лай виниз илимдин макъалаяр, 3 монография хкатнава. Ада илимдин рекьяй тухвай ахтармишунар уьлкведин илимдин фондарин грантриз лайихлу хьайидини къейд авун герек я. В.Бейбалаева Урусатдин илимдин кьилин тешкилатри кьиле тухузвай конференцийра, симпозиумра ва маса мярекатра иштиракзава, вичин тежриба хкажзава.
Кафедрадин доцент Ветлугин Бейбалаева илимдин рекьяй ДГУ-дин математикадин ва компьютеррин илимдин факультетдин декандин заместитель ва РАН-дин геотермиядинни арадал хкведай энергетикадин месэлайриз талукь Институтдин илимдин чIехи къуллугъчи яз кIвалахзава.
2021-йисуз, образованидин ва илимдин хиле къазанмишнавай агалкьунар фикирда кьуна, В.Бейбалаеваз “Дагъустан Республикадин образованидин лайихлу къуллугъчи” тIвар гана. Алай вахтунда алимди вузда лекцияр кIелзава ва факультетда тешкилзавай международный ва Вирироссиядин илимдин конференцийрин программайрин комитетдин председателдин заместителдин везифаяр тамамарзава. Ада гьакIни илимдин семинардиз регьбервал гузва.
Дустари, санал кIвалахзавай юлдашри, студентри Ветлугин Жабраиловичаз юбилей мубаракзава, адахъ чандин сагъвални яргъи уьмуьр хьун алхишзава. И тебрикриз чнани шериквал ийизва.
Чи мухбир
