Бубайрин мисалда лугьузвайвал, багъманчи гьихьтинди ятIа, ада гьасилай емишриз килигна къимет гуда. Муаллимдикайни гьакI лугьуз жеда: адан “емишар” тарс гана, чIехи хьана, хъсан пешекарар хьанвай виликан ученикар я. Чпикайни къе муаллимар хьанвай жегьил пешекарри чпин сад лагьай муаллимдикай хуш келимаяр лугьун, адаз гьуьрмет авун мадни шадвал кутадай кар я.
И йикъара зун “Жуьрэтлувиляй” ордендин сагьиб Абдул Саидован тIварунихъ галай Эминхуьруьн юкьван школадиз жуван хтулри кIелзавай гьалдиз килигун патал фенвай. Зи патав кIелунин рекьяй школадин директордин заместитель Румина Рамазанова, дидед чIаланни литературадин муаллим Жамила Жигерова ва сифтегьан классрин муаллим Залина Исмаилова атана.
— Гьуьрметлу журналист, вуна хъсандиз кIвалахзавай инсанрикай, кьилди къачуртIа, муаллимрикай газетдиз мукьвал-мукьвал макъалаяр кхьизва, — лагьана Румина Рамазановади. — Чаз вуна чи пуданни сифтегьан муаллим хьайи, чи насигьатчи, меслятчини тир Мирзоева Жейран Аслановнадикай газетдиз макъала кхьенайтIа кIанзавай. Ам тариф авуниз лайихлу инсанни, пешекарни я. Къе Жейран Аслановнадихъ галаз са школада муаллимар яз кIвалахун чна чи бахтлувал яз гьисабзава.
Зи фикирдалди, виликан ученикри ихьтин келимаяр лугьун, гьуьрмет авун гьар са муаллим патал шадвал кутадай кар я.
Ж.Мирзоева къадим Дербент шегьерда яргъал йисара ракьун рекьерал рабочийвиле ва машинистдин куьмекчивиле кIвалахай Аслан ва гамарин фабрикада кIвалахай Гуьлселем Идрисоврин хизанда дидедиз хьана. И хизанда 7 аял — 4 рушни 3 гада чIехи хьана.
Дербентдин Макаренкодин тIварунихъ галай 9-нумрадин юкьван школада 8-класс акьалтIарай Жейран Дербентдин педучилищедик экечIна, 1980-йисуз сифтегьан классрин муаллимрин отделение лап хъсан къиметар аваз акьалтIарна.
Гьа и йисуз Жейрана ва Эминхуьряй тир жегьил муаллим Мурад Мирзоева чпин рикIер, сирер сад авуна, цIийи хизан кутуна. Са йисуз абуру кьведани Саратовда муаллимар яз кIвалахна.
1982-йисалай инихъ Жейран Аслановнади Абдул Саидован тIварунихъ галай Эминхуьруьн юкьван школада сифтегьан классрин муаллим яз кIвалахзава.
— За муаллимвилин пеше хкягъун дуьшуьшдин кар туш, — лугьузва Ж.Мирзоевади. — Зи халу ва хала, абурун веледарни муаллимар тир. Кьисметдай юлдаш Мурад Исабалаевич, адан дах Исабала Гьажибалаевични муаллимар хьана. Муаллим хьунал къе за шадвални ийизва. Пешеди заз руьгьдин таъминвални гузва.
Аквазвайвал, Ж. Мирзоевади акьалтзавай несилдиз чирвилер ва тербия гуз 40 йисалай виниз я. Ада 1-классдиз кьабулна, гуьгъуьнлай школа акьалтIарай гзаф гадайрикайни рушарикай къе илимрин кандидатар, чIехи дережайрин руководителар, муаллимар, духтурар, инженерар ва маса пешекарар хьанва. Гзафбуру къени чпин сифтегьан муаллимдихъ галаз алакъаяр хуьзва.
— Къе закайни кIвалахдин гзаф йисарин тежриба авай муаллим хьанва, — лугьузва школада дидед чIалан ва литературадин тарсар гузвай Жамила Жигеровади. — Захъ чIалан месэлайрай гьам районда, гьамни республикадин дережада тухвай конкурсра гъалибвилер ава. За ибур Жейран Аслановнадин зегьметдин гьунар яз гьисабзава.
— Зун школада 1-классдиз атай вахт, Жейран Аслановнади сифтегьан классра гайи тарсар, адан насигьатар къени зи рикIел алама, — лугьузва сифтегьан классрин муаллим Залина Исмаиловади. — КIвалахиз башламишай сифте йикъарилай эгечIна ада заз куьмекар гуз хьана, и кар ада давамни ийизва. Ам зи виридалайни рикI алай муаллимни я, насигьатчини. За Жейран муаллимдиз хайи дидедиз хьиз гьуьрметзава.
ЦIинин кIелунин йисузни Ж. Мирзоевади 1-класс кьабулнава. Классда 13 аял ава. Вири тарсарай агакьзава.
— Зи сифтегьан муаллим хьайи Жейран Аслановнадикай рахадайла, заз ихьтин са карни къейд ийиз кIанзава, — давамарзава ихтилат кIелунин рекьяй школадин директордин заместитель Румина Рамазановади. — Гьар цIийи кIелунин йис башламишдайла, чи патав гзаф диде-бубаяр къведа, абуруз чпин аялар Жейран муаллимдин гъилик кутуна кIан жезва. Идани къалурзава хьи, Жейран Аслановнадиз диде-бубайри гьуьрметзава. Гьакъикъатдани, ада сифтегьан классра тарсар гайи аялри чIехи классриз акъатайлани хъсан къиметар аваз кIелун давамарзава, районда ва республикада школьникрин олимпиадайра кIвенкIвечи чкаяр кьазва.
Лагьана кIанда, Жейран муаллим чешне хьана, школа акьалтIарна педагогвилин институтрик ва училищейрик экечIай гадайрин ва рушарин кьадар тIимил туш. Ахьтинбурукай сад адан руш Людмилани я.
— Жейран Аслановна чи школада гьам пешедал, гьамни аялрал рикI алай муаллимрикай сад я, — лугьузва школадин директор Рагьман Османова. — Тежрибалу муаллимдиз школадин руководстводин, кIелзавайбурун ва абурун диде-бубайрин патайни еке гьуьрмет ава.
Жейран Аслановна Мирзоевадин яргъал йисарин намуслу ва бегьерлу зегьмет РД-дин образованидин ва илимдин министерстводин, райондин образованидин управленидин ва школадин дирекциядин патай гьуьрметдин грамотаяр, къиметлу пишкешар гуналди къейднава.
Хазран Кьасумов
