Ван авуна

Гьуьрметлу «Лезги газетдин» редакция! Алай йисан чи газетдин­ 35, 36-нумрайриз «ТIал алай мес­эла» рубрикадик кваз акъатай     Ш. Шихмурадован «Хуьрер куь­ча­­рун — алай девирдин вилерай» ма­къала за са шумуд сеферда­ пара дикъетдивди кIелна. Ада зун къарсатмишна, зи кьарай, ахвар­ атIана. Гзаф рикI тIардай месэла­диз талукьарнава макъала. Гзаф хъсандиз кхьенва авторди. Лугьун­ хьи, ам куьчарун ваъ, лап суьргуьн авун тир. Эхь, камаллу са кас­дивай уьлкве абад ийизни жеда, са ахмакьдивай — барбатIизни. Хрущеван чIуру сиясатди чи уьл­кве, гьукумат бар­батIна, харапI­на.­ Месела, — ада акъудай ихьтин къарарри (постановления): «Об ук­рупнении сельских поселений», «Об упразднении некоторых сельских районов» ва мсб.

ИкI, вишералди, агъзурралди хуьрер, гзаф районар тахьай мисална. Вуч хьанвай кьван чи Докъузпара райондиз, аник квай хуьрериз — Филериз, Гъугъванриз­, Макьариз, Кучунриз?! Хуьрер куьчарун тIимил акуна, чи районни тергнай. Гьахъ, адалат, девлет авай гьихьтин район!

Идалайни гъейри, хуьрера яша­миш жезвай агьалийриз Хрущева гзаф мал-къара, лапагар хуьн къадагъа авунвай. Колхозчийриз анжах вад лапаг, са кал, са балкIан, 10 верч хуьдай ихтияр­ ганвай. Им, лаш гана, хуьрерай чукурун туширни бес?!

Нетижада чи гуьзел дагълар, гьихьтин ерияр баябан хьанва. Элкъвена анриз хъфин гзаф четин месэла я. Гьукуматди вичин къуьн  кутун чарасуз я. Дуьз къейдзава­ авторди: махсус программа кьабулна кIанда. Бубайри лугьуда: зияндин юкьвалай элкъуьгъ! Ша чун элкъвен хъийин чи дагъларихъ, багъри ватанрихъ. Сада-са­даз куьмекиз, анра сад-кьве кIвал хьайитIани эхцигин. Шад жедай кар ам я хьи, чи Гъугъвандал вад кIвал хъхьанва.

Метлеблу макъаладин автор Ш. Шихмурадоваз рикIин сидкьидай чухсагъул лугьуз кIанзава. Къуй адахъ сагъламвал, кIвале, хизанда шадвал, берекат хьурай. Мад сеферда къейд ийин хьи, гадарнавай хуьрериз куьч хъхьун муракаб месэла я. Вучиз ла­гьайтIа, хъфидай агьалийриз мумкин я къайдаяр чир тахьун, ихтиярни тагун. Алай девирда вуч хьайитIани жезвайди я. Мумкин я чилерин месэлани аваз хьун ва я пайда хьун. Макъала гзаф мет­леблу, марагълу илимдин кIва­лах я. Ам урус чIалал маса из­данийрини чап авуртIа, хъсан жеда. И тIал алай месэла вири Дагъус­тандиз талукьди я. За ам гьукуматдин дережада гьялун, ­талукь чиновникри, районрин кьилерини чпин гаф лугьун, куьгьне хуьрериз хъфидай ашкъи авай агьалияр гъавурдик кутун теклифзава.

Мамед  Мегьамедов,

муаллим, Мегьарамдхуьруьн райондин Гъугъванрин хуьр