Алатай гьафтеда Кьасумхуьрел СтIал Сулейманан райондин 95 йисан юбилей къейдна

19-октябрдиз Кьиблепатан Дагъустанда чIимел югъ тиртIани, СтIал Сулейманан райондин агьалийрин рикIера чимни шадвилин гьиссер авай: и юкъуз Кьасумхуьрел шад гьалара райондин 95 йис тамам хьуниз талукьарнавай мярекатар кьиле фена.

Экуьнин сятдин 10-далай Ибадулагь Тагьирован тIварцIихъ галай медениятдин макандин вилик квай мулкунилай кьуд патахъ зуьрнединни далдамдин ванер алахьзавай. Ина муниципалитетдин жуьреба-жуьре хуьрери милли майданар тешкилнавай. Гьар са майдандал мугьманриз лезги тIуьнар недай, чай хъвадай, чкадин медениятдивни адетрив мукьувай таниш жедай мумкинвал авай. Яргъа амаз чпин къати рангарин нехишри фикир желбзавай гамар, Испик­рин къадим сеняткарвилин кьетIенвилер вилив хвена гьазурнавай хъенчIин къапар мярекат­рин кьилин безекриз элкъвенвай.

 

Шадвилин мярекатрик атанвайбурун арада республикадин гьукумдин органрин, яратмишдай ва илимдин интеллигенциядин,­ жемиятдин векилар, РД-дин Халкьдин­ Соб­ранидин депутатар, Украинада кьиле­ физвай махсус серенжемдин иштиракчияр ва масабур авай. Мугьманрин арада РД-дин Гьукуматдин Председателдин замес­ти­тель Нариман Абдулмуталибов, РД-дин Халкьдин Собранидин депутатар тир Имам Яралиевни Марат Алияров, Дагъустандин халкьдин шаирар тир Сажидин Саидгьасановни­ Майрудин Бабаханов ва хейлин масабур­ акуни мярекатрин важиблувиликай лугьузвай.­

Медениятдин макандин фойеда гьар жуьредин выставкаяр тешкилнавай. Кьилди къачуртIа, ина СтIал Сулейманан райондихъ хьанвай агалкьунрикай хабар гузвай, алай вахтунда кьилиз акъудзавай проектрикай, медениятдин надир адетрикай, лезги халкьдин тарихдикай, баркаллу рухвайрикай, зегьметкешрикай хабар гузвай пипIер кардик кутунвай. Дербентда авай Гьажи Давудан тIварцIихъ галай руьгьдинни марифатдин центради (кьилевайди — Самур Алиев) лезги халкьдин регьбер, имам Гьажи Давудан уьмуьрдин ва женгинин рекьериз талукьарнавай выставкани тешкилнавай.

Мярекатрин асул пай медениятдин макандин чIехи залда кьиле фена. Сифте гаф мугьманрин вилик СтIал Сулейманан райондин кьил Саид Темирханов рахана. Ада хайи район вилик финин карда сад хьунин, сада-садаз куьмекар гунин важиблувал къейдна ва муниципалитетдин тарихдикай, эхиримжи йисара хьанвай агалкьунрикай суьгьбетна.

«Играми мугьманар, районэгьлияр! За квез виридаз чи райондин 95 йис тамам хьун рикIин сидкьидай мубаракзава. И лишанлу вакъиади къе чун саднава, чалай вилик квай несилри арадал гъайи баркаллу тарихдалди къенин йикъан агалкьунрал мад сеферда дамахдай, абурукай рахадай мумкинвал ганва.

95 йисан девирда районди гьар жуьредин имтигьанривни метлеб авай гъалибвилерив ацIанвай мензилар атIанва. Экономика, хуьруьн инфраструктура вилик фена, яшайишдин алакъаяр мягькем хьана, милли адетар несилрилай несилрал агакьарна. Вири и гьерекатри, вакъиайри, руьгьдин ивирри чи гъвечIи Ватан надир макандиз элкъуьрна.

Заз къе район вилик финин рекье жуьреба-жуьре теклифар гузвай, гьакъисагъвилелди зегьмет чIугвазвай, ам абад, авадан хьуник чпин пай кутазвай гьар са ватанэгьлидиз сагърай лугьуз кIанзава. Къе СтIал Сулейманан район яшайиш патал къулай шартIар авай, гьар садаз яшамиш жез, кIвалахиз кIан­за­вай чкадиз элкъвенва. Им чи виридан гьунаррин бегьер я!

Ша чун идалай кьулухъни, садвилин руьгь хвена, сада-садаз куьмекар гуз, виликди фин. Къуй чи умуми алахъунри чун цIийи кукIушрихъ тухурай ва чалай кьулухъ къведай несилар патал хъсан чешнеяр арадал гъидай мумкинвилер гурай», — лагьана С.Темирханова.

Гуьгъуьнлай мярекат кьиле тухузвай РД-дин медениятдин лайихлу къуллугъчи Ярагьмед Ярагьмедова гаф республикадин вице-премьер Нариман Абдулмуталибоваз гана.

Нариман Абдулмуталибова хейлин йисара СтIал Сулейманан райондиз регьбервал гана, ам яша­йишдинни экономикадин рекьяй вилик финик вичин пайни кутуна. Мярекатдин иштиракчийриз муниципалитетдин юбилей мубарак авунихъ галаз сад хьиз, ада Дагъус­тандин Кьил Сергей Меликова районэгьлий­рин тIварцIихъ рекье тунвай Тебрикдин чар кIелна. Вице-премьерди вичин рахунра СтIал Сулейманан районди галаз-галаз пуд йисуз, республикадин дагъдин ценерив гвай районрин арада яшайишдин вири хилерай къазанмишнавай агалкьунрал гьалтайла, 1-чка кьунвайдакай хабар гана. Къейд ийин хьи, 2023-йисан нетижайралди, Дагъустандин виридалайни хъсан муниципалитетрин арада лезги мад кьве район ава. Кьилди къачуртIа, дагъдин районрикай 1-чкадиз — Ахцегь, 2-чкадизни Докъузпара районар лайих­лу хьанва. Абуруз виридаз республика­дин бюджетдин гьисабдай пулдин грантар гудайвал я. Санлай къачурла, виридалайни хъсан муниципалитетрин арада грантар паюн патал 25 миллион манат пул чара авунва.

СтIал Сулейманан райондин агьалийриз лишанлу сувар РД-дин Халкьдин Соб­ра­нидин депутат Имам Яралиевани мубаракна.

«Къенин мярекатди неинки тарихдин агалкьунар, гьакIни чун сад-садахъ галаз алакъалу ийизвай инсанвилин чими алакъа­ярни лишанламишзава. Къе СтIал Сулейманан район чешнелу несилар чIехи жезвай­, цIийи хизанар кутазвай, хайи чилихъ рикI кузвай зегьметкешри кIвалахзавай макандиз элкъвенва. Чи адетри, медениятди, садвили чун жуьреба-жуьре имтигьанрин вилик къуватлу ийизва. Район вилик финик пай китунвай гьар садаз за къе сагърай лугьузва. Ша чна и рекье къачузвай камар зайифар тийин, мадни цIийи гъалибвилер къачуз алахъин. Къуй куь кIвалера датIана — бахтни берекат, рикIера анжах шад, чими гьиссер хьурай», — лагьана Халкьдин Соб­ранидин депутатди.

Алай вахтунда СтIал Сулейманан районда кьилиз акъудзавай инвестицийрин проектрикай рахадайла, Имам Яралиева сенатор, меценат Сулейман Керимован хизандин тIварцIихъ хуш келимаяр лагьана. Адан гафаралди, Сулейман Керимова неинки са Дербент шегьер, СтIал Сулейманан район вилик финик вичин пай кутазва, гьакIни вири Дагъустандиз яшайишдин вири рекьерай куьмекар гузва. «Дагъларин уьлкведа Сулейман Керимов хьтин рухвайрал лайихлудаказ дамахзава. Герек гьар са макъамда чун чи кьегьал, жумарт хциз куьмекдин гъил яргъи ийиз, къуьн кутаз гьазур я», — алава хъувуна Имам Яралиева.

Мярекатдин сергьятра аваз, Н. Абдулмуталибовани И. Яралиева яшайишдин жуь­реба-жуьре хилера тафаватлу хьайи са шу­муд касдив шабагьар, пишкешар вахка­на­.

Къейд ийин хьи, 19-октябрдиз Кьасумхуьрел СтIал Сулейманан 95 йисан юбилей­дин мярекатрихъ галаз санал лезгийрин къагьриманвилин «Шарвили» эпосдин суварни къейдна, гьар йисуз республикадин дережада аваз тешкилзавай манидин «Куьредин ярар» фестивални кьиле тухвана.

СтIал Сулейманан район Дагъустандин чIехи ва вилик физвай муниципалитетрикай сад я. Ина Алкьвадар Гьасан эфендиди, Етим Эмина, СтIал Сулеймана ва хейлин масабуру кутур баркаллу рекьер лайихлудаказ давамарзава.

Агьмед  Магьмудов