18-августдиз Махачкъалада РД-дин Гьукуматдин Председателдин заместитель Абдулмуслим Абдулмуслимован регьбервилик кваз “2020-2025-йисара хуьруьн мулкар вилик тухун” программадин сергьятра аваз кьиле тухузвай эцигунрин кIвалахриз талукь месэлаяр веревирдна. Идакай “Лезги газетдиз” республикадин Кьилин ва Гьукуматдин Администрациядин пресс-къуллугъди хабар гана.
РикIел хкин, тIвар кьунвай программадин везифайрик хуьруьн чкада яшамиш жезвай агьалияр тIем акакьдай яшайишдин кIвалералди таъминардай шартIар арадал гъун, абурун арада бейкарвилин месэлаяр гьялун, хуьруьн чкада инфраструктура вилик тухун -акатзава. Программа уьмуьрдиз кечирмишдайла, АПК-дин (агропромышленный комплекс) кьилиз акъудзавай проектар кардик квай хуьрериз кьетIен фикир гузва.
А.Абдулмуслимова кьиле тухвай совещанидал са шумуд объект эцигунин месэладиз килигна. Абурун арада Къизляр райондин Сарсар хуьре (ана яшамиш жезвайбур лезгияр я) яшайишдин дарамат эцигун патал майдан авадан авуниз талукь проектни ава. Къейд ийин хьи, и объектдиз “Государственная экспертиза проектов” ГКУ-ди герек тир документар ганва ва “Дагсельхозстрой” ГКУ-дини “Нива” ООО-ди лазим икьрарни кутIуннава.
“Лезги газет»
