Алатай гьафтеда Дагъустандин Кьилин везифаяр вахтуналди тамамарзавай Сергей Меликова Урусатдин жуьреба-жуьре регионра авай республикадин ва РД-дин Гьукуматдин векилрихъ галаз гуьруьш кьиле тухвана. Адан сергьятра аваз уьлкведин маса регионрихъ галаз алакъаяр мягькемарунин месэлаяр веревирдна.
С.Меликова къейд авурвал, сифте нубатда, миллетрин арада жуьреба-жуьре рекьерай авай (мисал яз, медениятдин, спортдин, диндин, экономикадин) алакъаяр мягькемаруниз кьетIен фикир гана кIанзава. Ида халкьарин арада дуствал, стхавал гужлу хьуниз таъсирда. “Са кьадар дагъустанвияр маса регионра миллетрин арада алакъайрин рекьяй кардик квай общественный советрин членар я. И кардикай менфят къачуна кIанда”, — лагьана республикадин Кьили.
ЦIи ДАССР арадал атайдалай инихъ 100 йис тамам хьанва. И вакъиадиз талукь гзаф кьадар мярекатар Урусатдин 23 регионда тешкилна. Вилик мад са важиблу вакъиа ква: 2023-йис Расул Гьамзатован йис яз малумарнава. Сергей Меликова хабар гайивал, и вакъиа неинки са чи, гьакIни къецепатан уьлквейрани къейддайвал я. Урусатда кьиле фидай мярекатар Президент Владимир Путинан гуьзчивилик жеда.
РФ-дин жуьреба-жуьре регионра авай РД-дин векилрин кIвалахдикай гегьеншдиз вичин докладда республикадин милли сиясатдин ва динрин крарин рекьяй министр Энрик Муслимова ихтилатна. Ада къейд авурвал, векилар Дагъустандиз инвестицияр желб авунин, Дагъларин уьлкведин инвестицийрин проектар кьилиз акъудунин, жуьреба-жуьре рекьерай алакъаяр мягькемарунин ва маса месэлайрал машгъул жезва. Абуру кIвалахдин суракьда авай, уьлкведин маса шегьерриз фенвай чи ватанэгьлийриз кIвалахдай чкаяр жагъурзава.
РД-дин экономикадин ва мулкар вилик тухунин министр Руслан Алиева къейд авурвал, гьакъикъатдани, регионра яшамиш жезвай дагъустанвийри хайи муг рикIелай алудзавач, инвестицийрин проектар кьилиз акъудуник чпин пай кутазва. Мисал яз, Р.Алиева “100 мектеб” проектдикай лагьана. Эхиримжи 4 йисан къене и проектдиз маса регионра авай дагъустанвийри 570 миллион манат пул чара авунва.
Гуьгъуьнлай векилри чпи тухузвай кIвалахдикай, вилик акъвазнавай месэлайрикай ихтилатна. Абурукай са жерге юлдашрив С.Меликова государстводин шабагьар вахкана.
Чи мухбир
