Ахцегь районди уьлкведиз машгьур хейлин инсанар гана. Дагъустандин агьалияр яшайишдин жигьетдай таъминарунин рекьяй  виликан министр рагьметлу  Латифа  Керимовна  Керимова   гьабурун жергедай я.

Л.Керимова 1920-йисан 10-ноябрдиз муаллимдин хизанда дидедиз хьана. Школада иллаки математикадал рушан рикI гзаф алай. Бубадихъ хъсан библиотека авайвиляй руша ктабар гзаф кIелдай. Тафаватлудаказ 7-класс куьтягьай Латифа Буйнакскдин финансрин техникумдик экечIна.

1937-йисуз Л.Керимовади Серго­къа­ла райондин сберкассадин кьилин бухгалтервиле кIвалахиз башламишна. Са тIимил вахтунилай ам Двигательстрой (Каспийск) поселокдиз рекье туна. Ина ада 1940-йисан эхирдалди кIвалахна. Адакай КПСС-дин До­къуз­пара райкомдин секретардин куьмекчини хьана. Дяведин четин йисара Латифа Керимовади Ахцегьрин РСК-дин кьилин бухгалтердин къуллугъ та­мамарна. Ахпа ам Махачкъаладиз Гострудсберкассайрин ва госкредитрин Управленидиз кьилин бухгалтервиле тайинарна. 1949-йисан эвелра адаз СССР-дин финансрин министр­дин буйругъдалди “Финансрин къуллугъдин советник” лагьай тIвар гана.

1949-1951-йисара Ленинградда авай СССР-дин Минфиндин высший финансрин курсара кIелна. Абур куьтя­гьайдалай кьулухъ КПСС-дин Да­гъус­тандин обкомдин административный ва алишверишдинни финансрин органрин отделда кIвалахна, гьа са вах­тун­да заочнидаказ Вирисоюздин финансрин институтда кIелна. Ада анаг, экономиствилин пеше къачуналди, 1955-йисуз куьтягьна. 1957-йисуз Л.Керимовадикай КПСС-дин Махачкъаладин горкомдин секретарь хьана. Инай ам Москвадиз КПСС-дин ЦК-дин къвалав гвай Высший партийный школадиз рекье туна. Ам куьтягьайдалай кьулухъ, 1959-йисуз, винидихъ кхьенвайвал Латифа Керимова ДАССР-дин агьалияр яшайишдин жигьетдай таъминарунин рекьяй министрвиле тайинарна.

Ана ада вичин лап хъсан ерияр тамамвилелди ачухарна. Яшлубурун ва набудрин кIвалер адан кьетIен къайгъударвилик квай. Латифа Керимовнадилай Махачкъала ва Буйнакск шегьерра типовой цIийи дараматар эцигун, амайбурни капитальнидаказ ремонт авун патал пул чара ийиз таз алакьна.

Ада ВТЭ-дин къуллугъдин пата­хъайни жаваб гузвай. 60-йисарин сифте паюна колхозчияр гзаф кьадарра пенсиядиз экъечIиз башламишна. Идакди адан къуллугъдин сергьятар гегьенш хьана. Гьавиляй министерстводин кьилин экспертдин — республикадин ВТЭК-дин председателдин ва ВТЭ-дин кьилин инспектордин къуллугъ кардик кутуна.

1961-йисуз Советрин Союздин делегациядик кваз Стамбул шегьерда агьалияр яшайишдин рекьяй таъминардай международный ассоциациядин (МАСО) 14-Генеральный ассамблеядал Л.Керимовади доклад авуна. 10 йисалай лагьайтIа, ам Будапешт шегьердиз МАСО-дин Генеральный ассамблеядал фейи РСФСР-дин агьалияр яшайишдин жигьетдай таъминарунин рекьяй  министерстводин делегациядин кьиле акъвазна. Л.Керимовади инал авур докладдиз кIватI хьанвайбуру еке итиж авуна.

Латифа Керимовнадиз партийный органра, ДАССР-дин гьукуматда ва иллаки агьалийрин арада авай гьуьрмет ва авторитет мадни артух хьана. Ам Белиждин округдай 6-9-созыврин ДАССР-дин Верховный Советдин депутатвиле хкянай. И йисара поселок чир техжедайвал дегиш хьана. Ам тамамвилелди электрикламишна, куьчейра къир цана, цIийи школаяр, яша­йишдин рекьяй къуллугъдай комбинат эцигна, цин провод тухвана. Вири и кIвалахра Л.К.Керимовадин лайих­лувал екеди тир. 1975-йисан залзаладилай кьулухъ Буйнакск шегьерда авай набуд аялрин кIвалин дарамат чкIана ва ам ишлемиш хъийидай мумкинвал амукьнач. Латифа Керимовнадин алахъунралди и идарадин цIийи типовой дарамат, Махачкъала шегьерда авай къуллугъчияр патал 5 мертебадикай ибарат яшайишдин кIвал эцигун патал пулдин такьатар чара авуна. Абур 1979-йисуз ишлемишиз вахкана…

Республикадин общественный уьмуьрда активвилелди иштиракиз хьайи Л.Керимова КПСС-дин об­комдин членвиле, Махачкъаладин горсоветдин депутатвиле, Дагоблсов­профдин членвиле хкянай. Адан гзаф йисарин зегьмет ва общественный кIвалах “Знак почета”, “Зегьметдин Яру Пайдахдин” орденралди, “1941-1945-йисарин Ватандин ЧIехи дяведа гьакъисагъ зегьметдай”, “Гьакъисагъ зегьметдай”, “В.И.Ленин дидедиз хьайи­далай инихъ 100 йис”, “Зегь­метда­ тафаватлувиляй” медалралди, Верховный Советдин ва ДАССР-дин агьа­лияр яшайишдин жигьетдай таъминарунин рекьяй министерстводин гьуьрметдин грамотайралди къейднава. Ам “ДАССР-дин лайихлу эконо­мист”­ ­лагьай тIварцIизни лайихлу ­хьана.

1983-йисуз  Л.Керимова Москвадиз куьч хьана. Ина медицинадин илимрин кандидат, вилерин азаррин Институтдин кьилин пешекар тир адан руш яшамиш жезва. Инани ада шегьердин, ветеранрин Советдин общественный уьмуьрда активвилелди иштиракзавай. Ам уьмуьрдин эхиримжи йикъалди вичин идеяйриз вафалу хьана. Ада тунвай баркаллу адетар гуьгъуьнин йисара хьайи министрри — Г.Гьамидовади, П.Багандовади, И.Эфендиева лайихлудаказ давамарна.

Яшайишдин къуллугъдин ветеранри Латифа Керимовнадин экуь ­къамат рикIера хуьзва. Республикадин вилик Л.Керимовадин лайихлувилер гьисаба кьуналди ва ам эбеди рикIел хуьнин лишан яз, ам яшамиш хьайи кIва­лел махсус кьул эцигун ва Махачкъаладин ветеранрин кIвал адан тIвару­нихъ ягъун лап кутугай кар жедай…

Нариман Мамедов