Самурдин тамун экология дуьзгуьн гьалда хьун неинки тIебиатда жезвай, гьакI инсандин гьерекатрихъ галазни сихдаказ алакъалу я.
Надир чка тир Самурдин тамун мулкунал федеральный метлебдин объектар ала: жуьреба-жуьре балугъри куьр вегьезвай ва я балугъар туьретмиш жезвай вирер, тама кьуьд акъудзавай ва санай масаниз физвай нуькIери мукар ийизвай, гьакIни вагьши гьайванар яшамиш жезвай чкаяр.
Тамарин майишатдин рекьяй Комитетдин председателдин везифаяр тамамарзавай Вагьаб Абдулгьамидова вичиз тешпигьди авачир тIебиатдин и пипIен месэлаяр гьялуниз кьетIен дикъет гузва. Тамухъанрин фикир идарадин руководстводи асул гьисабдай цIаяр кьуниз акси ва санитариядин жигьетдай хатасузвилин кIвалахриз гузва.
Самурдин тамун паркуна гьар йисуз цIаяр кьазвай цIудралди чкаяр малум жезва. ЧIехи пай дуьшуьшра абур инсанрин дикъетсузвал, къайгъусузвал себеб яз арадал къвезва.
ИкI, ял ягъун патал тамуз къвезвай инсанар чпи кутур цIаяр туьхуьр тавуна хъфизва. Эгер виликамаз серенжемар кьабул тавуртIа, кьурай векьерилай цIай тараривни агакьун мумкин я. ЦIаяр кьунин хаталувал авай чкаяр виликамаз жагъурун патал тама патрулрин куьмекдалди ахтармишунин къайда кардик кутунва.
Алай вахтунда тамара цIай кьунихъ галаз женг “Дагестанский лесопожарный центр” ГАУ-дин къуллугъчийри ва чкайрал алай тамухъанри (далудал вегьена, жував гваз тухудай цIай тухуьрдай алатдин ва мотопомпайрин куьмекдалди) чIугвазва. Самурдин тамун паркунин къуллугъчийри таму цIаяр кьур дуьшуьшра тади серенжемар кьабулун патал къарасудилай фидай муьгъни хсуси къуватралди туькIуьрнава.
И йикъара Самурдин тамун мулкунал Вирироссиядин дережадин “Яшамиш хьухь, там” серенжем кьиле тухвана. Адан сергьятра аваз, тамун паркунин 0,8 гектар майданда чIулав макъун тарарин 1500 къелем цана ва 2 гектардилай виниз майдан зирзибилдикай михьна. Серенжемда 20-дав агакьна тамухъанри ва патарив гвай хуьрерай тир гуьгьуьллубуру (волонтерри) иштиракна.
Самурдин тамун сергьятра 8 хуьр ава. Ана 18 агъзурдалай гзаф агьалияр яшамиш жезва. Ида там сагъламарунин кIвалах са кьадарда четинарзава. Заказникдин мулкар чиркинарунин месэлани хцидаказ акъвазнава.
Чкадин тамухъанри тамув мукъаятлудаказ эгечIунин, кьурай векьериз цIаяр ягъ тавунин, ял ягъай чкайрилай зирзибил кIватI хъувунин гьакъиндай патарив гвай хуьрерин агьалийрихъ галаз датIана суьгьбетар тухузва. КIелдай чкайра аялриз тамун экология хуьниз талукьарнавай тарсар гузва. Тамун мулкунални чка-чкадал инсанриз тIебиат хуьниз эвер ва жермейрикай хабар гузвай махсус тахтаяр куьрсарнава. Там чи къацу жигерар я. Адав къайгъусузвилелди эгечIна виже къведач.
Мегьамед Мегьамедгьажиев
