Алатай асирдин 1930-йисара уьлкведа ва гьакI Дагъустандани, квачир тахсирар кутуна государстводин, обществодин, культурадин, искусстводин вишералди деятелар, алимар, муаллимар ва маса ксар суьргуьндиз акъуднай, дустагъра тунай, гзафбуруз кьиникьин жаза ганай. Абурук Муртузалиев Саид Агъамирзоевични ква.
Саид Муртузалиев 1910-йисуз Кьасумхуьрел къуллугъчидин (Куьре округдин суддин векил) хизанда дидедиз хьана. Адан диде Рейгьанат зурба алим, тарихчи Гьасан эфенди Алкьвадарвидин руш тир.
Саида гъвечIи чIавалай чирвилерихъ гьерекатна. 14 йиса авайла, ам комсомолрин жергейриз гьахьна. 1927-йисуз Кьасумхуьруьн школа куьтягьайла, ада Буйнакскда рабфакда кIелун давамарна. Идалай гуьгъуьниз ада вичин чирвилер Дагъустандин агропедагогвилин институтда, Москвада авай миллетрин рекьяй илимдинни ахтармишунардай педагогвилин институтда артухарна. 1936-йисуз Муртузалиева Ленинграддин журналистикадин госинститутдик экечIун патал документар вугана.
Вичин са куьруь уьмуьрда Муртузалиева Къайтагъдин, Терекли-Мектебдин ва Кьасумхуьруьн школайра акьалтзавай несилдиз урус чIалан ва литературадин тарсар гана. Ада “Комсомолец Дагестана” газетдани кIвалахна.
Къени, хъсан гьар са карда активвилелди иштиракиз кIанзавай Муртузалиев вичин чирвилер, вердишвилер артухариз алахъна. Адан кIвал жуьреба-жуьре ктабрив ацIанвай. Азад вахтни ада абур кIелиз акъудзавай. Гьайиф къведай кар ам я хьи, Муртузалиеван библиотекада Советрин гьукуматдин идарайра чIехи къуллугъар кьиле тухвай партиядин деятелар Рыкован, Бухаринан, Зиновьеван ктабарни авай. Гьабур себеб яз, Саид Агъамирзоевич контрреволюционеррин жергеда, халкьдин душманрин арада туна. 1936-йисуз НКВД-дин Дагъустандин управленидин къарардалди Саид Муртузалиеваз кар атIана ва ам Магадандин областдиз акъудна. РСФСР-дин Верховный Суддин Президиумдин 1991-йисан 17-апрелдин къарардалди Муртузалиев Саидан гьакъиндай кьабулай нагьахъан къарар къуватдай вегьена.
Адан вах Ханумни лайихлу, викIегь дишегьли тир. Ада хейлин йисара Кьасумхуьруьн райондин азарханада старший медсестравиле кIвалахна. Гьакъисагъ зегьметдай адаз “Знак Почета” орден гана. ДАССР-дин здравоохраненидин сад лагьай нарком — уьмуьрдин юлдаш Рза Шихсаидов фад рагьметдиз фенатIани, Ханума пуд хва чIехи авуна. Аскерани Атема Ватандин ЧIехи дяведа фашистрихъ галаз кьиле фейи женгера чпин чанар къурбандна. Пуд лагьай хва, и мукьвара рагьметдиз фейи Амри Шихсаидов (зи чIехи буба) республикада ва гьакI уьлкведани тIвар-ван авай профессор тир.
Вахтар алатзава, амма чна нагьахъан гужарик акатай Саид Агъамирзоевич хьтин рухваяр гьамиша рикIел хуьн герек я.
Саид Гьажиев
