Алатай гьафтеда Дагъустандин са жерге­ СМИ-рин векилар дявединни драмадин «99 лагьай» («99-й») фильм чIугвазвай май­­дандал — Новолак райондин­ Новокъу­ли­ хуьруьз — мугьман хьана. «Ме­диа юниверсал ивент» АНО-ди РД-дин Кьилин­ ва Гьукуматдин Администрация­дихъ га­лаз санал тешкилнавай пресс-тур­да­ журналист­риз неинки фильм арадал­ къвезвай тегьердихъ галаз таниш жедай, ам арадал гъизвай ксарихъ — кьилин­ режиссёр Лео­нид Пляскинахъ, «Чеге­ри» ва «Серебро»  ­­­ кинокомпанийрин продюсе­рар­­ тир Ибра­гьим Мегьамедовахъ, Бинке­ Аниси­­мо­вахъ, Евгений Мишиевахъ­, Алек­сей­ Ники­форовахъ ва Денис Госте­вахъ­, гьакI­ни­  ­­­ кьилин игит­рин ролра къугъ­ваз­вай Рос­сия­дин актерар тир Сергей Мари­нахъ, Ирина Пеговадихъ, Павел Чинаревахъ, Сергей Яценюкахъ ва Вадим Цалла­тидихъ галаз мукьувай таниш жедай, фильм­дикай суьгьбетдай мумкинвал хьана.

Фильмдин тIварцIяйни аквазвайвал, ам 1999-йисан августдизни сентябрдиз, международный бандитрин дестеяр Дагъус­тандиз гьахьайла, гьакъикъатда кьиле фейи вакъиайриз талукь я. Адан бинеда­ жуьреба-жуьре миллетрин векилри, жуь­реба-жуьре динрал амалзавай ксари, сад хьана, Ватан гьикI хвенатIа ава. Дагъустандин милиционерри, Новолак райондин милициядин гъвечIи отделди ва Липецкдин ОМОН-ди тамам са суткада 2 агъзурдалай виниз бандитрикай ибарат кIеретIдин гьужумдин хура гьикI акъвазнатIа, игитвал къалурзава.

Фильм арадал гъиз куьмек гунай кьилин режиссёрди ва продюсерри РФ-дин Президент В. Путиназ, Дагъустандин Кьил Сергей Меликоваз, гьакIни ам видеокамерадиз къачур районрин муниципалитетрин кьиле авай ксариз, са жерге министерствойрин регьберриз сагърай лагьана.

— 1999-йисан августдинни сентябрдин вакъиайрикай фильм арадал гъунин фикир аваз са шумуд йис тир. Дагъустандин Кьил С. Меликова адан тереф хуьналди, анжах кьве йис идалай вилик фильмдин гьазурвилерив эгечIна. Съёмкайриз саки 3 варз акъатна. Эхиримжи 10 юкъуз абур Новокъулида кьиле физва. Абур Дагъустандин са шумуд районда, кьилди къачуртIа, Гуниб райондин Чох хуьрени кьиле фена. И карда гьар юкъуз саки 200-дав агакьна ксари иштиракзава. Фильмда яракьар, ягъунар, хъиткьинарунар гзаф ава. Гьаниз килигна, ам арадал гъунин кIвалах четинди, гьа са вахтунда итижлудини я, — къейдна Бинке Анисимова.

Фильм чIугвазвай майдандал Дагъус­тандин Гьукуматдин Председателдин за­мес­титель Муслим Телякавовни атанвай. Ада 25 йис идалай вилик чи халкьди, сад хьана, Ватан гьикI хвенатIа, рикIелай ракъур тавунихъ, иллаки къенин юкъуз чна а завалдин вилик пад кьун патал дяведин махсус серенжемда иштиракзавайла, мадни еке метлеб авайди къейдна.

Журналистриз (мумкин я, ихтилат физвайбуруз чпизни), гзафни-гзаф таъсир авур крарикай сад кьилин ролда къугъвазвай игит-актер ва гьакъикъи кас чеб чпиз акун, чеб чпихъ галаз таниш хьун тир. ИкI, актер Вадим Цаллати, фильмда — Тагьир Дажаев, ам Новолак РОВД-дин начальник я, 1999-йисан вакъиайрин девирда отделдин начальникдин везифаяр кьилиз акъудай Муслим Дахаевахъ галаз гуьруьшмиш хьана­.

Кьилин ролрикай сада къугъвай Ирина Пеговадиз съёмкайрин продюсерди ва режиссёрри, гьакI кIватI хьанвайбуру Россиядин халкьдин артистка лагьай тIварни мубаракна.

Фильм гегьенш экранра 2025-йисан ок­тябрдиз къалурун пландик ква.

Рагнеда Рамалданова