Россиядин чемпион
8-10-ноябрдиз Каспийскда какахьай жуьредин бягьсерай «Кавказдин кубок» лишандик кваз акъажунар кьиле фена. СтIал Сулейманан райондин Кьулан СтIалдилай тир Амрид Эседова 52 килограммдин заланвал авайбурун арада 3 бягьс кьилиз акъудна ва сад лагьай чка кьуна. Гила ада дуьньядин чемпионатдиз гьазурвал аквада. Къуй адахъ гьанани гъалибвал къачудай къуватар хьурай!
Россиядин чемпионвилин тIвар къачунвай Амридан 16 йис я. Ада икьван чIавалди республикадинни уьлкведин дережада кьиле фейи маса акъажунрани гъалибвилер, агалкьунар къазанмишна.
С. Салимов
ВикIегьдаказ иштиракна
10-ноябрдиз Санкт-Петербургда, СССР-дин спортдин лайихлу мастер Виктор Новожилован экуь къаматдиз бахшна, азаддаказ кьуршахар кьунай жаванрин арада кьиле фейи Вирироссиядин турнирда вичин ери-бине СтIал Сулейманан райондин Герейханован хуьряй тир Саид Амаханова (92 кг-дин заланвал авайбурун арада) къизилдин медаль къазанмишна. Идакай чаз райадминистрациядин пресс-къуллугъди хабар гана.
Малум хьайивал, турнирда чи ватанэгьлиди пуд бягьс кьиле тухвана, пудани гъалибвал къазанмишна. Спортдин хиле агалкьунар адахъ идалай виликни хьана. Кьилди къачуртIа, ам Дагъустандин, Санкт-Петербургдин кIвенкIвечивал патал акъажунрин, гьакI са жерге турниррин гъалибчи я. Ада тренер Ибрагьим Царухаеван гъилик вичин устадвал хкажзава.
Экуь къаматдиз бахшна
Са шумуд югъ идалай вилик СтIал Сулейманан райондин Агъа СтIал-Къазмайрал, Жуьрэтлувиляй ордендин сагьиб Руслан Абасован экуь къаматдиз бахшна, мини-футболдай школайрин командайрин арада гьар йисуз тухузвай турнир хьана. Къизгъиндаказ кьиле фейи къугъунрин нетижада Кьасумхуьруьн 1-нумрадин — 1, Агъа СтIалрин — 2 ва ЦIийихуьруьн школайрин командайри 3-чкаяр кьуна.
КIвенкIвечи чкаяр кьур командайрив хьиз, виридалайни хъсан къугъвай футболистривни шабагьар ва пишкешар вахкуниз талукьарнавай шад мярекатда иштиракай райондин администрациядин кьилин 1-заместитель Лацис Оружева, гьакIни турнирдин тешкилатчияр тир райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидова, Агъа СтIалрин хуьруьн советдин кьил Надир Эфендиева жаван футболистрихъ гележегда агалкьунар хьунин умудлувал къалурна, ихьтин серенжемри аялрик руьгь кутазвайди, абурун арада дуствал мягькемарзавайди къейдна.
«Леки» — «Къизляр» — 10:2
8-ноябрдиз, футболдай Дагъустандин чемпионатдин 11-турдин сергьятра аваз, Мегьарамдхуьре «Леки» ва «Къизляр» командайрин арада кьиле фейи къугъун 10:2 гьисабдалди акьалтIна.
Футболдай Дагъустандин 8-сеферда чемпион тир «Леки» командади идалай виликан 4 турдани инанмишвилелди гъалибвилер къазанмишнава. Кьилди къачуртIа, «Леки» — «Академия Динамо-ВТБ» — 4:1, «Леки» — «Дербент» — 3:1, «Леки» — «СССР Махачкъала» — 3:0 гьисабралди акьалтIна.
Нубатдин 12-турдин къугъунар 23 ва 24-ноябрдиз кьиле фида. Адан сергьятра аваз, «Леки» «Дагъустан» УОР-дихъ галаз къугъвада.
Рагнеда Рамалданова
