1-ноябрдиз СтIал Сулейманан районда Урусатдин Игитар — Энвер Набиевни Руслан Къурбанов — шад гьалара кьабулуниз талукьарнавай мярекат кьиле фена. Ана муниципалитетдин кьил Саид Темирханова, РД-дин Халкьдин собранидин депутат Имам Яралиева, райондин депутатрин Собранидин председеталь Штибег Мегьамедханова, администрациядин векилри ва масабуру иштиракна.
Саид Темирханова Украинада кьиле физвай махсус серенжемда акьалтIай викIегьвилер къалурнавай дагъустанвийриз Игитвилин тIварар гун СтIал Сулейманан райондин вири агьалийрин патай мубаракна ва абурун кьегьалвилер алай вахтунда къуллугъзавайбуруз, акьалтзавай несилриз ватанпересвилин чешнеяр тирди къейдна.
— Къе чи райондин надир чилел, гьуьрметлу мугьманар яз, Дагъустандин кьегьал кьве хва кьабулунал за дамахзава, — лагьана мярекатдал рахай Имам Яралиева. — Энвер Набиевани Руслан Къурбанова чпин уьмуьр Ватандиз къуллугъ авуниз бахшнава. И рекье абуру гьакъикъатдани жуьрэтлувилер къалурзава. РФ-дин Игитдин тIвар чи уьлкведин виридалайни виниз тир шабагь, адаз лайихлу хьун игитвал я… Чна Ватандин къуллугъда акъвазнавай вирибурал дамахзава ва абуруз сагърай лугьузва. Украинада кьиле физвай серенжемни чун гъалиб хьуналди акьалтIдайдахъ зун кIевелай инанмиш я, — къейдна Имам Яралиева ва Седакъет Керимовадин “Чун лекьер я” шиир кIелна.
Игитрин тIварарихъ хуш келимаяр военком Рейзудин Женетова, СтIал Сулейманан райондин ветеранрин советдин председатель Ислеман Ризаева, мергьяматлувилин “Умуд” фондунин векил Савин Велиева, Украинада кьиле физвай махсус серенжемдин иштиракчидин буба Абдулнасир Ханвердиева ва масабуру лагьана.
Мярекатдин сергьятра аваз Саид Темирхановани Савин Велиева Игитриз райондин администрациядин ва «Умуд» фондунин патай багьа савкьатар пишкешна.
Эхирдай Энвер Набиевани Руслан Къурбанова чпиз СтIал Сулейманан райондиз теклифунай ва чеб багьа мугьманар хьиз кьабулунай гуьруьшдин тешкилатчийриз сагърай лагьана.
Агьмед Магьмудов
