Алай вахтунда Дагъустанда балугъчивилел машгъул жезвай карханайрин кьадар 64-далай алатнава
31-октябрдиз Дагъустандин Кьил Сергей Меликова республикада балугъчивилин хел вилик тухунин месэлайриз талукьарнавай совещание кьиле тухвана. РД-дин балугъчивилин майишатдин Комитетдин председатель Виктор Руденкоди хабар гайивал, алай вахтунда регионда йисан къене 100 агъзур тонндив агакьна жуьреба-жуьре жинсерин балугъар кьадай ва абурукай 40 агъзур тонндилай виниз суьрсет гьазурдай мумкинвал ава. Мисал яз, 2021-йисан нетижайралди, Дагъустанда балугърикай 43,2 тонн суьрсет гьазурна. В.Руденкодин фикирдалди, алай йисуз и рекъем агъуз аватдач.
Гьа са вахтунда республикада балугъар гьялунихъ, балугъчивилин майишатар материально-технический рекьяй цIийи хъувунихъ галаз алакъалу месэлаярни ава. Абур гьялун ва балугъчивилин хел санлай вилик тухун патал махсус концепция арадал гъанва ва ана асул фикир ганвай крарикай сад и хилез инвесторар желб авун я.
“Лезги газетдиз” РД-дин Кьилин пресс-къуллугъди хабар гайивал, алай вахтунда Къизляр районда инвестицийрин 2 проект кьилиз акъудзава. Абурукай садан куьмекдалди балугъар гьялзавай цех цIийикIа туькIуьр хъийизва, кьвед лагьайдан сергьятра аваз осетрдин жинсинин балугъар туьретмишдай алай аямдин кархана эцигзава.
Махачкъала шегьердин балугърин портни цIийикIа туькIуьр хъувун вири республика патал лишанлу вакъиа я. ЦIийи хъувунвай порт кардик ахкатайдалай гуьгъуьниз ана кIвалахдай100-дав агакьна цIийи чкаяр пайда ва гьялзавай балугърин кьадарни са шумуд сеферда артухардай мумкинвилер жеда.
В.Руденкоди алай вахтунда республикада балугъчивилел агалкьунар аваз машгъул жезвай са шумуд карханадин тIварар кьуна. Абурун арада “Главрыба”, “Голдфиш”, “Янтарное” ва масабур ава. И хиле кIвалахзавай карханайрин кьадардикай рахайтIа, абур 64-далай гзаф я.
Совещанидин нетижаяр кьадайла, Сергей Меликова Дагъустандин экономика патал балугъчивилин хилехъ авай важиблувал къейдна ва ам вилик тухун патал гьукумдин талукь органриз са жерге тапшуругъар гана.
Агьмед Магьмудов
