И мукьвара Хасавюрт райондин образованидин работникрин профсоюздин райкомдин председатель Акгёзов Къалсына юбилеяр хьанвай мектебрин профсоюзрин тешкилатрин председателар тебрикна. Абуруз профсоюздин райкомдин патай грамотаярни пишкешар гана. Абурун арада Хасавюрт райондин Къурушрин хуьруьн 1-нумрадин юкьван мектебдин профкомдин председатель ва социальный (яшайишдин) педагог Лазимов Акиф Эсетовични авай.
Инсан тек са вич патал яшамиш жезвач, ам гьамиша вичин кIвал, хайи жемят патал гьерекатдик ква, вичивай жедай, алакьдай куьмекдин гъил яргъи ийизни чалишмиш жезва. ГьакI хьайила жемятдизни ам алай чка аквазва, инсандин къадирни гьа вахтунда чир жеда.
Гьам хуьре, гьам мектебра гьихьтин мярекатар тухуз хьайитIани, чаз анра Акиф Эсетович аквада, ам хуьруьн общественник, гьакIни шаир яз чида. Адан сифте эсерар виликдай хуьре акъудзавай “Зегьметдин пайдах”, гуьгъуьнлай республикадин “Лезги газет”, “Дагъустандин комсомол”, “Дуствал”, “Хабарар” газетриз, “Кард”, “Самур” журналриз акъатна.
Ам лезги писателрин Союздин член я. Акиф Эсетовичан тIвар “Лезги зарияр” ва “Яру дагъдин шагьвар” ктабрани гьатнава. Гьеле мектебда кIелзамай йисара Акифа (1977-йис) Хасавюрт шегьерда тешкилнавай “Жегьил мухбирар” тIвар алай клубда са йисан курсар кIелна.
1980-йисуз хуьруьн 2-нумрадин юкьван мектеб акьалтIарай ам уьлкведин Яракьлу Къуватрин жергейриз фена. Ватандин вилик буржи вахкана хтай А.Лазимов Махачкъалада авай финансрин техникумдин экечIна.
Анаг акьалтIарай жегьил пешекар Бабаюртда авай Сберкассадиз инспектор-ревизор яз кIвалахал рекье туна. Алакьунриз, пешекарвилиз килигна, са кьадар вахт арадай фейила ам РД-дин КРУ-дин (контрольно-ревизионное управление) кьилин ревизорвиле тайинарна. Жавабдар къуллугъдал ада яргъал йисара кIвалахна.
Акиф Лазимован зегьметдин агалкьунар гьа йисара банкдин председатель хьайи А.И.Шихареван, ДАССР-дин Сбербанкдин отделенидин начальник А.И.Алистанован патай ганвай гьуьрметдин грамотайри, Дагъустандин банкдин Гьуьрметдин ктабда тIвар гьатуни, Гьуьрметдин доскада шикил эцигуни, маса шабагьри тестикьарзава.
2000-йисуз, гьукуматдин банкар арадай акъудайла, Акиф Эсетовича вичиз цIийи пеше — муаллимвал — хкяна. Ам хуьруьн 1-нумрадин юкьван мектебда социальный педагог яз кIвалахал тестикьарна. Гьа са вахтунда ада Хасавюртда авай педколледжни акьалтIарна. Лагьана кIанда, Акиф муаллимди вичин везифаяр намуслудаказ тамамарзава. Ада хуьруьн “четин аялар” авай хизанрихъ галаз суьгьбетар тухузва. Дарда авай хизанрай тир аялрив райондай герек тир куьмекар агакьарунин кардал машгъул жезва, диде-буба амачир аялрин пенсийрин месэлаяр гьялиз, аялар гатун вахтунда лагерриз рекье тваз куьмекзава. 2015-йисуз Хасавюрт райондин мектебрин арада тухвай “Виридалайни хъсан социальный педагог” конкурсда Акиф Эсетовича 1-чка кьунай.
Къейд ийин хьи, яргъал йисара образованидин хиле гьакъисагъвилелди зегьмет чIугвазвай А.Лазимоваз Хасавюрт райондин образованидин управленидин начальникдин къул алай са шумуд грамотани гана.
Акиф муаллимди “Инсанрин ихтиярар аялрин вилералди” республикадин конкурсдиз гьазурай аялри 1-чка кьуна ва абур гьазурунай муаллим Дагъустан Республикадин инсанрин ихтиярар хуьдай векил Уммупазил Омаровадин къул алай дипломдиз лайихлу хьана.
“Чкади инсан ваъ, инсанди чка гуьрчегарзава” гьавайда лугьузвач. Гьахълу гафар я. Абур чи макъаладин игит, 60 йисан юбилей къаршиламишзавай Лазимов Акиф Эсетовичаз хас я. Къуй вахъ кIвалахдин рекье мадни чIехи агалкьунар хьурай!
Гь.Къазиев,
РД-дин лайихлу муаллим
