Метандин станцийриз куьмекда

Республикада улакьрал метандин  тадаракар эцигдай станцийриз куьмекар гуда. Идакай  “Дагъустандин экономика” телеграм-каналди хабар гузва. Дагъустанда вири улакьрин вадай са пай метандал ала. Амма улакьар ихьтин кудайдалди таъминардай мумкинвал анжах 17 станциядихъ ава.

РД-дин гьукумдин кьилевайбуру гьисабзавайвал, метандин станцийрихъ гележег ава. Гьавиляй улакьрал метандин алатар эцигунал машгъул жезвай станцийриз куьмек гун пландик кутунва.

КIвенкIвечийрин жергеда

Як ва какаяр гьасилунин жигьетдай Ставраполь Дагъустандилай вилик акатнава, амма некIедин кьадардал гьалтайла, Дагъларин уьлкве и региондилай вилик ква. Идакай “Дагъустандин экономика” телеграм-каналди, Кеферпатан Кавказдин статистикадин Управленидин рекъемрал асаслу яз, хабар гузва.

ИкI, 1-кварталдин нетижайралди, нек гьасилунин кьадардал гьалтайла, Да­гъустан СКФО-да 1-чкадал ала: санлай къачурла 157, 3 агъзур тонн нек арадал гъанва. 2022-йисан 1-кварталдин рекъемрихъ галаз гекъигайтIа, им 1,4 процентдин гзаф я.

Амма як (133, 8 агъзур тонн) ва какаяр (саки 240 миллион) гьасилунин  жигьетдай сифте чкадал Ставрополдин край ала.

Махсус техника гьазурнава

Россельхозцентрадин Дагъустанда авай филиалдин директорди къейд авурвал, республикади цицIерихъ галаз женг тухун патал махсус техника гьа­зурнава. Идакай “Дагъустан” ин­фор­м­агентстводи хабар гузва.

10-майдиз республикадин Кочубейдин зонада Мароккодин цицIерин  шарагар чилин винел акъатнавайдакай хабар чукIурна. Къейдзавайвал, зиянкаррихъ галаз женг тухун патал са шумуд машин­ махсус техника гьазурнава. Абурун арада “Туман-2” тIвар алай опрыскивателарни ава. Лазим хьайитIа, гьатта авиацияни кардик кутадайвал я.

Филиалдин директордин гафаралди, 2018-йисалай инихъ цицIери кьунвай майданрин кьадар йисалай-суз 3 сеферда тIимил хьанва. Им филиалди муници­палитетрихъ галаз санал тухвай кIва­лахдин нетижа я. 2023-йисакай ра­хайтIа, адан гафаралди, зиянкарар пайда жедай мулкарин кьадар 29 агъзур гектардилай артух жедач.

Гьазурайди — Муса Агьмедов