Ватандин, халкьдин вилик лайихлувилер къалурай, терроризмдиз ва экстремизмдиз акси яз тухвай женгера чпин чанар къурбанд авур игитрин экуь къамат эбеди яз рикIел хуьн чи пак тир буржи я. Дербент шегьерда и кардиз  артух фикир гузва ва игитрин  тIварарихъ куьчеяр, мектебар язава, абур яшамиш хьайи кIвалерин, кIелай мектебрин цларал мемориалдин кьулар эцигзава.

Мукьвара и барадай яргъалди рикIел аламукьдай вакъиа хьана. Алатай йисан гатфа­риз вичи къуллугъзавай постунал алайла игитвилелди телеф хьайи полициядин майор Гьасан Муталибован экуь  къамат мармарда эбедиламишуниз талукь тир митинг кьиле фена.

РикIел хкин. 2016-йисан 30-мартдин пакамахъ Гьасан Муталибова къуллугъдин рекьяй вичин юлдашдихъ галаз санал контроль­но-пропускной постунал са-са машин ди­къет­дивди ахтармишиз, ахъайзавай. Тахминан йи­къан сятдин 11-даз са машин гьалзавайда полициядин работникри “акъвазара” лагьай ишарадиз яб ганач, машиндиз генани худ гана. Гзаф фикир тавуна Гьасан ва адан юлдаш, милиция­дин сержант Тарлан Агьмедов катзавай машиндин гуьгъуьна  гьатна. Табасаран райондин­ Сиртыч хуьруьв агакьзавай къекъуьндал поли­циядин работникри катзавай машин акъвазаруниз мажбурна. Амма гьа и чIавуз машин­ хъит­­­кьинна. Гужлувал ахьтинди тир хьи, машин­­ ва ада авай террористар кIус-кIус хьана. Полиция­дин майор Гьасан Муталибовни телеф хьана. Гуьгъуьнлай адан игитвал гьукуматди “Жуь­рэтлувиляй” ордендалди лишанла­миш­на.­

Къейдна кIанда хьи, кьегьал хва Гьасан Му­талибова вичин вахтунда Дербент шегьердин­ 2-нумрадин гимназия агалкьунралди акъалтIа­райди я. Гимназиядин коллективди, шегьердин общественностдин векилри, Дербент шегьердин администрациядин кьилин заместитель  Жа­лалудин Алирзаева, полициядин подполковник Оруж Жирингова  ва маса ксари иштиракай мярекатдилай кьулухъ игитди кIелай гимна­зиядин цлал эцигай мемориалдин мармардин кьул зулун цуькверин кIунчIари безетмишна.

Нариман Къарибов