Россиядин Президент Владимир Путина Нижний Новгородда малумарайвал, Сирияда кардик кваз хьайи террористрин вири тешкилатар барбатIна, куьтягьна. Малум тирвал, Сирияда ва Иракда гьакъикъи гьукуматрин аксина женгер чIугур террористрин арада вишералди дагъустанвиярни авай. Бязибуру араб уьлквейриз чпин хизанарни тухванвай.
“Новости” РИА-ди хабар гузвайвал, Иракдин Мосул шегьер террористрикай азад авурдалай гуьгъуьниз гъиле гьатай террористрин хизанар Багъдаддин дустагъда тунва. Чечен Республикадин гражданвилин общество вилик тухунин ва инсандин ихтиярар хуьнин рекьяй советдин член Хеда Саратова РИА-диз дишегьлийрин ва аялрин сиягь вугана. Исятда талукь органри абур Россиядиз хкидай рекьер — хуьлер жагъурзава.
Багъдаддин дустагъда тунвай дишегьлийрин ва аялрин арада хирер хьанвайбурни ава. Абурук Дагъустандин 11 дишегьлини акатзава. Ингье абур: Махачкъаладай тир Муртузалиева Женнет Насрутдиновна (2 аял), Мурадалиева Анжела Мурадалиевна (2 аял), Омарова Зуьгьре Рамазановна (4 аял), Хангишиева Зарият (2 аял), Гадхимурат Аида Ибрагьимовна (4 аял), Дербентдай тир Алимова Фатима Абдулбариевна (2 аял), Беримова Ферида Низамудиновна (3 аял), Сулейман-Стальский райондай тир Идрисова Диляра Зейнидиновна (2 аял).
Сиягьда яш тамам тахьанвай кьве рушни ава.
«Лезги газет»
