1-июлдиз Россиядин Игит Зейнудин Батманован диде Султанханум Батмановади вичин юбилей къейдна. КьетIен югъ адаз Кьурагь райондин кьил Замир Азизова, Кьурагь райондин патай РД-дин Халкьдин Собранидин депутат Девлетхан Алиева, райондин дишегьлийрин Советдин председатель Эльмира Исаевади ва масабуру мубаракна.
Султанханум Батманова КIирийрин хуьре яшамиш жезва. Тамухъан яз кIвалахай адан хва Зейнудин Батманов 2015-йисуз террориствилин мусибатдин дуьшуьшдик игитвилелди телеф хьанай.
«Райондин вири агьалийрин патай рикIин сидкьидай тебрикдин гафар кьабула. Чаз квехъ мягькем сагъвал хьана кIанзава. Къагьриман хва тербияламишунай чна квез дериндай чухсагъул лугьузва. Куьне акьалтзавай несил патал чешне тир халисан ватанпересдиз тербия гана. Къуй куь кIвале ислягьвал, бахтлувал хьурай», — лагьана З. Азизова.
Чи мухбир
