«Игитрихъ галаз суьгьбетар» федеральный проект я. Адан сергьятра аваз, Дагъустандин школьникар, жегьилар Россиядин Игитрихъ галаз гуьруьшмиш жезва. 16-январдиз меркездин 54-нумрадин юкьван школадин ватанпересвилин центрада аялар Россиядин Игит Энвер Набиевахъ галаз гуьруьшмиш хьана. Школадин директор, Россиядин Игит Нурмегьамед Гьажимегьамедован диде Сапижат Исаевнади мугьман залда кIватI хьанвайбурухъ галаз танишарна, ахпа майор Э. Набиева аялрихъ галаз важиблу месэлайрикай суьгьбетна.
Игитди вичин школада кIелай вахтар, рикI алай тарсар, муаллимар, спортдин акъажунра къазанмишай агалкьунар рикIел хкана. ГъвечIи чIавалай вичиз военный жедай фикир авайдакай лагьана. Казандин танкарин военный училище акьалтIарайдалай гуьгъуьниз, взводдин командир яз, Ватандиз къуллугъ авунив эгечIайдакай ихтилатна.
— Дяведин махсус серенжемдани за сифте йикъарилай иштиракзава. Зи подразделениди Киевдин, Донецкдин, Запорожьедин, Луганскдин, Харьковдин мулкара миллетбазрихъ галаз женгер тухвана, — лагьана Энвер Набиева. — Заз ганвай Россиядин Игитвилин тIварцIик зи ротадин вири аскеррин пай ква. Чна командованиди вилик эцигай гьар са тапшуругъ кьилиз акъудна, миллетбазрикай Донбассдин чилер азад авуник аквадай хьтин пай кутуна. Душмандин техника, гьакI цIудралди аскерарни тергна.
Игитди школьникрин суалризни жавабар гана. «Вуж гъалиб жеда?» суалдиз «нетижа анжах сад жеда — чи гъалибвал», — лагьана мугьманди. Ада гьакI чкадин агьалийринни Россиядин армиядин кьушунрин арада авай хъсан рафтарвиликайни суьгьбетна.
Эхирдай Сапижат Исаевнади мугьмандиз вичин хцикай кхьенвай «Ватанперес» ктаб багъишна ва вирида санал шикилар яна. Идалай виликни Игит Махачкъаладин студентрихъ, жемиятдин тешкилатрин активистрихъ, школьникрихъ галаз гуьруьшмиш хьанай.
Хийир Эмиров
