Маса макьамдал кьуьлда
Украинадин чешмейрал асаслу яз, «РИА Новости» сайтди хабар гузвайвал, США-динни Россиядин президентар телефондай рахадалди вилик В. Зеленскийдиз Д. Трампаз вичин фикир малумариз кIанзава.
Къейд ийин, идалай вилик США-дин регьберди тади гьалда Владимир Путинахъ галаз гуьруьшмиш жез кIанзавайдакай малумарнай. В.Путина Д.Трампахъ галаз кьве терефдизни хийирлу тир вири хилерай веревирдер ийиз гьазур тирди лагьана. Москвади Украинадин гьакъиндайни рахунар ийиз гьазур тирдакай са шумудра малумарнай, амма Киевди 2022-йисан окятбрдиз ихьтин алакъайрал къанундалди къадагъа эцигна.
Мукьвара Киевдиз США-дин махсус илчи Кит Келлог фидайвал я. Аквадай гьаларай, Зеленскийди гила маса макьамдал кьуьлда.
Гъалибвилин суварик…
Бразилиядин президент Лула да Силвадиз Москвада Гъалибвилин 80 йисахъ галаз алакъалу яз кьиле фидай мярекатда иштиракдай ашкъи ава. «Лента.ру» чешмеди хабар гузвайвал, ихьтин фикир ада РФ-дин Президент Владимир Путиназ малумарна.
«Бразилиядин регьберди Ватандин ЧIехи дяведа къазанмишай Гъалибвилихъ галаз алакъалу яз 9-Майдиз Москвада кьиле фидай суварик теклифунай Россиядин терефдилай разивал ийизва», — малумарнава уьлкведин регьбердин пресс-секретарди.
Къейд ийин, идалай вилик президентар телефондай раханай. Абуру дуьньядин гьалар, гьа жергедай яз Украинада авай къалмакъалдиз талукь месэла веревирдна.
Махсус серенжемдикай
РФ-дин оборонадин министерстводи 27-январдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 652 самолет ва 283 вертолет, зенитный ракетайрин 590 комплекс, пилот галачиз лув гудай 41571 аппарат, 20858 танк ва дяведин маса машинар, РСЗО-дин 1510 машин, артиллериядин ва маса 21010 яракь, военный махсус 30830 автомашин тергна.
27-январдиз РФ-дин Яракьлу Къуватри Украинадин военный ва энергетикадин объектриз гегьенш ягъунар кьуна. Хъиткьинунар Киевда, Кривой Рогда, Сумскдин, Днепропетровскдин областра ва масанра арадал атана. Нетижада НАТО-дин артиллериядин техникани тергна.
Чуьнуьхай пул вахчуда
РФ-дин генеральный прокуратуради Курскдин область еримлу авунин корпорациядин кьиливай, адан заместителдивай ва са жерге карчийривай 3,2 миллиард манатдилай гзаф пул вахчун истемишнава. Идакай «РИА Новости» чешмеди хабар гузва.
Къейдзавайвал, регионда оборонадин имаратар кардик кутадай икьрарар кутIундайла, са жерге тешкилатри пулунин такьатар чпиз кьуна. Прокуратуради вири иштиракчийривай (гьам кьилдин ксаривай, гьамни тешкилатривай) рейсадвилелди пул вахчун истемишнава. Идалайни гъейри, ришветбазвилиз рехъ ганвай фирмайрин ва иштиракчийрин эменни дустагъ кьунин чарасузвиликай малумарнава.
Украинадин сергьятдиз мукьва регион хьуниз килигна, даяхдин пунктар, дяведикай хуьдай маса имаратар эцигун патал 2022-2023-йисара Курскдин областдин гьукуматдиз федеральный бюджетдай 19,4 миллиард манат чара авуна.
Гъил хунай — 300 000 манат
Санкт-Петербургдин прокуратуради кIвалин гьаятда алукьай пенсионеркадиз 300 агъзур манат пул эвез яз хгунин къарар акъудна.
Агьвалат алатай йисан ноябрдиз шегьердин гзаф мертебайрин кIвалин гьаятда арадал атана. ЦIуьдгъуьнунинкди алукьай яшлу дишегьлидин чапла гъил хана. Ахтармишунин нетижада тайин хьайивал, арадал атай агьвалатдин тахсиркар тротуар лазим тирвал живедикайни винел акьалтнавай муркIадикай михьи тавур «Просвещение 24/2» ТСЖ (товарищество собственников жилья) я.
ТСЖ-ди яшлу дишегьлидив, зияндин эвез яз, 300 агъзур манат пул вахкун патал прокурорди суддиз арза вугана.
Гьазурайди — К. Ферзалиев
