9-майдиз Дербент шегьердин майдандал ЧIехи Гъалибвилин суварин мярекатар кьиле физвай. Иштиракчийрин арада шегьердин администрациядин векилар, ветеранар, шегьерэгьлияр ва мугьманар авай. Сувар вини дережада аваз тешкилнавай. Садлагьана майдандал кьил рехи хьанвай, тандал чIулав парталар алай, вилер хци, викIегь, жуьрэтлу дишегьли экъечIна. Гъилер хкажна, халкьдихъ элкъвена, ада эверзавай: “Ватандин къуллугъда акъваз вири сад хьиз! Къанлу душмандиз рум гун патал Диде-Ватанди эверзава! Сад хьухь!”.
“Я руш, ви рикIел аламани, гьеле чна мектебда кIелзавайла, тарихдин муаллимди тарсуниз гьа ихьтин дишегьлидин шикил алай плакат гъанай. Яраб и дишегьли гьам я жал?”, — лугьуз, хабар кьазвай мярекатда иштиракзавай са дишегьлиди масадавай. Гьа ихьтин суалдин ван хьайила, завай жаваб тагана акъвазиз хьанач. За абуруз ам чи Лезги театрдин бажарагълу артистка Агъасиева Назира тирдакай лагьана. Гьелбетда, рахазвай дишегьлияр гьахълу тир. Назиради Ватан хуьниз эвер гузвай дидедин къамат лап хъсандиз къалурзавай. Гьа ихьтин тегьерда актрисади театрда вичел ихтибарзавай ролар тамамариз ингье цIуругуд йис я. Иервални бажарагъ авай артисткадин тIвар виринра машгьур хьанва.
Назира гъвечIи чIавалай манийрал ва кьуьлерал рикI алай руш тир. И кар чизвайтIани, Атем муаллимдиз вичин рушакай духтур хьана кIанзавай. Амма гьамиша Назирадин фикир Лезги театрдин артистка хьун тир. Рушан мурад кьилиз акъатна. Исятда Назира Лезги театрдин тежрибалу артисткайрикай сад я.
Театрдиз атай сифте йикъарилай рушан къастунал кIевивал, гуьрчегвал ва бажарагъ акуна, режиссёрри адал гьар жуьредин роларни тапшурмишна: Гьуьруья — “Зиярат” Абдуселим Исмаилован, Пери — “Асиятан рехъ” Расул Гьамзатован, Свас — “Часпар” Фейруз Беделован, Зульмира — “Муьгьуьббатдин къуват” Хайбулла Абдулгъапурован, Мубарик — “МуркIадал кIвал” Муса Агьмадован, Цуьквер — “Шарвилидин шивни тур” Эседуллагь Наврузбегован ва масабур.
“Назиради арадал гъизвай гьар са къамат са вакъиа я лагьайтIа жеда. Ада тамамарзавай гьар са роль тамашачийри хушдиз кьабулзава, гьикI хьи, абур рикIел аламукьдайбур жезва. Гьатта са гьихьтин ятIани синихар квай игитар хьайитIани, актрисади ролар тамашачийри лап хъсандиз кьабулдайвал тамамарзава”, — лугьузва театрдин кьилин режиссёр, Дагъустандин халкьдин артист Мирзебег Мирзебегова. Режиссёрдин фикир тестикьарун патал алай вахтунда Назира Агъасиевади яратмишзавай къаматрикай лагьайтIа жеда. Ада театрдин репертуардик квай гьар жуьредин жанрайрин тамашайра алай аямдин жегьил дишегьлидин цIийи шикилрал чан гъизва: Атав Атаеван “Пагь и варз алай йифер” къемедада — Саниятан, Абдуселим Исмаилован “Пуд югъ” драмада — Маралан, Микаэл Базоркинан “Къизилдин раб” трагедияда — Наркоманкадин, Антон Чехован са пердедин “Муьгьуьббатдикай зарафат” къемедада — Наталья Поповадин…
Малум тирвал, Назиради театрда ва шегьерда жезвай концертра маниярни лугьузва ва гьар жуьредин мярекатарни кьиле тухузва.
Хизандикай рахадайла, “Зи экуь мурад-вири веледар бахтлу хьун я”, — лугьузва кьуд баладин диде Назиради.
Эминат Заирбекова
