Дуьньяда кьериз-цIаруз гьалтдай, чеб надир хьанвай гьайванар, къушар, гьашаратар, набататар тIимил авач. ТIебиатдин шартIар, гьакI инсанрин гьерекатар себеб язни бязи гьайванрин кьадар тIимил жезва.
Шикилдай аквазвай хушраканни тIимил амайбурукай — Яру ктабда гьатнавайбурукай я. Адаз къушар недай хушракан (паук-птицеед) лугьузва. Хушраканрикай ам виридалайни гуьрчег акунар алайди яз гьисабзава. И хушраканар (Антарктида квачиз) вири континентрин тамара яшамиш жезва. Тарарин дувулрин къвалав тIеквен туькIуьрна, гьана яшамиш жеда. Эгер хаталувал гьиссайтIа, абур гьасятда чпин муказ гьахь хъийизва.
И хушраканрин вири жуьрейрик са кьадарда зегьер ква. Эгер инсан кIасайтIа, адаз кьиникьин хаталувал авач, амма пис тIар жеда, ифин акьалтда ва икI мад. ТIуьнин еринда абуру гъвечIи гьашаратар, чепелукьар, пепеяр, хъипер, къушар, балугъар ва мсб. ишлемишзава. И хушраканар 1 йисалай 10 йисал кьван вахтунда яшамиш хьун мумкин я.
Итижлу делилрикай садни ам я хьи, и хушраканар арахнофобия (хушраканрихъай кичIе хьун) азар сагъарун патал ишлемишзава.
Гьазурайди — Куругъли Ферзалиев
