Зенд
Хуьруьг Тагьир рикI алаз кIелиз кIан жедай шаиррикай сад я. Ада 1945-йисара “Эрекьдиз” шиир кхьена. Совет гьукуматдин вахтара регьберри ичкидиз вичин тайин чка ганвай. Суварриз, мугьман атайла, дустар ацукьайла ва рикIяй-рикIиз ихтилатар ийидайла, шуьше суфрадал чарасуз тир.
Къуллугъчийри (къуллугъчи дишегьлийрини кваз) мярекатрал тостар лугьун патал гъиле ички авай рюмка кьадай. ГьакI ятIани, шаир вичин шиирда ичкидиз къведай къимет гуз алахънава. Месела, эхиримжи куплетда лугьузва:
Духтурривай дарман тежер,
Гагь-гагь артух жеда ви шер .
Хуьруьг Тагьир, гъафил межер,
Вун гьахьтин муртад я, эрекь.
Шер — фитне, лагълагъ, буьгьтен манайрин гаф.
Муртад — хаин, мунафикь, динсуз манаяр…
Шер гвай муртад — ингье шаирди ичкидиз ганвай асул къимет. И йикъара Х.Тагьиран эсерриз мад сеферда килигдайла, и шиирни кIелна. Фикирдиз суал атана: вахтар алатнава, къенин къайдаяр масабур я, инсанрин хъсан-пис дегиш хьанва, дин хтанва. Эрекьдихъ дережа амач, хъунал дамахиз жезмач. Яраб Тагьир бубади и шиир къе гьикI кхьидайтIа?
Веревирдер авурла, зун шиирдик ихьтин дегишвилер кухтун мумкин тир лугьудай фикирдал атана.
Я стхаяр, килигайла,
ГьакIан алциф яд я эрекь.
Дуьз лагьайтIа, хъунин къене
Гзаф туькьуьл затI я эрекь.
Яр-дуст жедач тахъвазвайдахъ,
РикIел текъвез а кIвалин рехъ.
Хъван тийидай сад-кьве бокал,
Низ герек я а дуст, эрекь?
Дуьньядава гзаф затIар.
Хъвадайбуру кьада ви тIвар.
Рюмкадалди ийиз дустар,
Лугьуз тостар тада, эрекь.
Ичкид рекье гьатай инсан
Кефчибегриз я са гьайван.
Им яни бес ви пис-хъсан,
Русвагьрин устад я эрекь!
Духтурривай дарман тежер,
Хъвайила, артух жеда ви шер.
Хуьруьг Тагьир, гъафил межер,
Вун гьахьтин муртад я, эрекь!
Шаир Тагьир буба ихьтин дегишвилер кухтунал рази жедайтIа яраб? Гьар вуч ятIани, Х.Тагьира вичин вахтунда ичкидин тарифнавайди туш. Къаб алаз лагьанва, ам вуч ятIа. Зани негьзава, ичкибазвал квадара лугьузва…
Навои Бутаев,
автотранспортдин хилен ветеран,
Дербент шегьер
