СтIал Сулейманан райондин Герейха­нован хуьре яшамиш  жезвай  Тават  Залбеговадивай  вичин уьмуьрдикай суьгьбетун тIа­ла­байла, ада  икI лагьанай: “… За жув бахтлу кас яз гьисабзава. ­Аллагьдиз шукур, захъ хъсан сагъламвал, гьуьр­метлу хизанни ава. Вири уьмуьрда за жедайвал халкьдиз къуллугъна. Жуван мецикай, сивикай масадан кефи ханач. Инсанриз жедай куьмек гана. Халкьди зун КПСС-дин XXIV съезддин делегатвиле хкяна”.

Т.Залбегова 1926-йисуз Кьеанрин хуьре дидедиз хьана. Хуьре — 4, Цмурдал 7-классар­ акьатIарна, Дербентдин педучилищедик экечI­на. 1943-йисуз дагъви руша зегьметдин рехъ хайи хуьруьн сифтегьан школада муал­лимви­ле кIвалахунилай башламишна. Ахпа Тават­ кьа­дар-кьисметди Герейханован хуьруьз акъуд­на.

Хъсан чирвилер, зигьин, кьатIунар авай, тешкилатчивилин кIвалах алакьдай Тават Зал­беговадиз жемятди еке ихтибар авуна: ам Герейханован хуьруьн советдин председателвиле хкяна. Жавабдар и везифа ада 1982-йисалди намуслудаказ тамамарна. И йисара хуьре культурадин дворецдин, участокдин больницадин, консервиярдай заводдин, гьамамрин, пекарнядин дараматар, яша­йишдин 8 кIвалер эцигна, хуьруьнвияр хъвадай целди таъминарна, кьилин куьчейра къван туна, аваданламишунин хейлин маса кIвалахарни кьиле тухвана.

Тават Залбеговади председателвиле ­кIва­лахзавай йисара советди государстводиз­ як, сар ва маса шейэр гунай планар артухни алаз тамамариз хьанай. Хуьруьн советдиз СССР-дин Министррин Советдин, 4 се­ферда ДАССР-дин Министррин Советдин, са шумудра КПСС-дин Кьасумхуьруьн райкомдин патай Яру пайдахар гана, хуьруьн Совет респуб­ликадин Гьуьрметдин доскадиз акъудна.

1982-йисуз Тават Къурбановна пенсиядиз фена. Райондин руководстводин ва хуьруьн жемятдин тIалабуналди ада 1991-йисалди со­ветдин секретарвиле кIвалах хъувуна, халкьдиз къуллугъ авун давамарна.

2003-йисан 9-майдиз Тават Залбегова ин­сафсуз ажалди чавай къакъудна. Инанмишвилелди лугьуз жеда хьи, адан экуь къамат, адан баркаллу крар инсанрин рикIелай садрани алатдач.

Хазран Кьасумов