Шадвилелди къейд ийиз жеда хьи, лезгийрин арада спортдин рекье еке дережайрив агакьзавай зурба пагьливанар йисалай-суз артух жезва. Ихьтин викIегь спортсменрикай садни вичин ери-бине Докъузпара райондин Къалажухрин хуьряй тир, алай вахтунда Дербентда яшамиш жезвай Султан Дельмарович Жаватов я. ЦIемуьжуьд йис тамам хьанвай жегьилди спортдин са шумуд жуьре (азаддиз кьуршахар кьун, грэпплинг, каратэ, какахьай женгер, кунг-фу…) вичиз муьтIуьгъарнава. Ам ММА-дайни, грэпплингдайни спортдин мастервиле кандидат я.
Султан 2001-йисуз Къалажухрин хуьре дидедиз хьана. Вад йис тамам хьайидалай кьулухъ спортдихъ галаз сих алакъа хуьз хьайи ада вичихъ и рекье алакьунар авайди жуьреба-жуьре акъажунра субутнава. Адахъ икьван чIавалди хьанвай бязи агалкьунарни къейд тавуна жедач…
2014-йисуз адакай азаддиз кьуршахар кьунай Дербент шегьердин чемпион хьана. 2014-2017-йисара галаз-галаз 9 сеферда грэпплингдай Дербент шегьердин чемпионвилин тIварни къачуна. Грэпплингдай ада 3 сеферда (2016-2018-йисара) Дагъустандин чемпионатрани гъалибвал къазанмишна. 2017-2018-йисар Султан патал мадни бегьерлубур хьана. ИкI, ам 2017-йисуз Казанда каратэдин вири жуьрейрай кьиле фейи Россиядин чемпионатда гъалиб хьана, гьа и йисуз Казанда грэпплингдай кьиле фейи Россиядин чемпионатдани приздин чка кьуна. 2017-2018-йисара адакай ММА-дай 2 сеферда Дагъустандин ва 2 сефердани Россиядин, гьакI грэпплингдайни Россиядин чемпион хьана.
Дербент шегьердин экономикадин колледждин къайдаяр хуьдай кIвалахдин факультетдин 2-курсуна кIелзавай Султана вичин азад вахт анжах спортдал машгъул хьуниз серфзава. Дагъви пагьливандиз хас тирвал, спортдин акъажунра ада гьар йисуз агалкьунралди иштиракзава. Алай йисуз С.Жаватова спортдин кунг-фу жуьредай Дагъустандин чемпионвилин тIвар къачуна, спортдин и жуьредай Барнаулда кьиле фейи Россиядин чемпионатда кубокдин сагьиб хьана.
И йикъара Эрменистандин меркезда спортдин кунг-фу файтинг жуьредай кьиле фейи дуьньядин чемпионатдани Султана вичин алакьунарни устадвал къалурна, дуьньядин кубок къазанмишна. Дуьньядин чемпионатдин финалда Эрменистандай тир Артем Аванесянан винел инанмишвилелди гъалибвал къачур Султан къизилдин чIулуниз, къизилдин медалдиз ва сертификатдизни лайихлу хьана.
Дуьньядин чемпионвилин тIвар тебрикунихъ галаз сад хьиз, чна дагъви пагьливандихъ мадни чIехи агалкьунар хьун алхишзава.
Куругъли Ферзалиев
