Алай йисан 6-апрелдиз «Нарын-Къала» цитателдин гъвечIи майдандал Саида Адамовадин (Шагьбановадин) художественный литинин хсуси выставка ачух хьана. Саида Шагьмурадовна Дагъустандин духтур дерматолог-косметолог, иглорефлексотерапевт, художник-дизайнер ва «Said Shah» бренд тешкилайди я. Ам Модайрин гьафтейрин, дизайнеррин конкурсрин, халкьарин арадин ва мергьяматлувилин фестивалрин иштиракчи я. Ингье абур: Мергьяматлувилин фонд «Русский силуэт», «Neva Fashion Week St.Petersburg», «Belarus Fashion Week», «Moscow FashionWeek» «Кавказдин стиль», «Халкьарин арадин IKFW модадин аялрин гьафте», «Халкьарин арадин «ФелтФест» литинин фестиваль», Халкьарин арадин «IBEFF», фестиваль «Maratona Di BaIIo» (Италия). Идахъ галаз сад хьиз, «Said Shah»-ди вахт-вахтунда журналар патал гьар жуьре фотосессийрани иштиракзава.
«Литинин хазинаяр» выставкада лит ишлемишуналди гьазурнавай милли нехишар галай шейэр, шикилар, декорациядин паннояр къалурна. Гьялнавай сарикай гьазурнавай мягькем материалдихъ надир ерияр ава. Ада чимивал тIимил квадарзава, гьава хъсандиз ахъайзава. Амма эгер виликдай лит хуьрера гьазурзавай литинин чекмейрихъ (валенкайрихъ) галаз гекъигзавайтIа, гила ада дизайнерар ва художникар гьевесламишзава.
Япунжи галачирди гьихьтин дагъви я? Литинин чекмеяр (валенкаяр) авачирди гьихьтин урус я? Медикрин ва модельеррин фикирдалди, Россиядин къадим заманадин и шейэр къени фикир гуниз лайихлу я. ГьикI лагьайтIа, абур тIебиатдин надир шейэрикай — литиникай гьазурнава. Кавказда лит са шумуд виш йис идалай вилик ишлемишиз эгечIнай. Япунжидилай ва чекмейрилай гъейри, Кеферпатан Кавказдин хейлин халкьарин девлетлу кIвалера нехишар алай литинин халичаяр машгьур тир. Гьеле XIX асирда абуру сиягьатчийрин ва Кавказдин агьалийрин яшайиш ахтармишзавайбурун фикир чпел желбзавай.
Немсерин географ Георг Маркграфа алатай асирдин эхирра кхьейвал, Кавказдин литер гуьрчегвилелди тафаватлу жезвай. Гьар жуьре рангарин литинин кIусар аламатдин кIалубра атIузва ва нехишралди цвазва. Ихьтин халичаяр чIагуруни еке устадвал истемишзава. Къе лагьайтIа, и еке устадвал Саида Адамовади къалурзава. Адан эсерри тамашачияр чпин кьакьан устадвилелди гьейранарзава. Литинин шейэри дагъустанвийри лит ишлемишунин надир къайдайрикай лугьузва. Выставка 18-майдалди давам жеда. Адаз килигун патал Пушкинан картадикай менфят къачуз жеда.
Дашдемир Шерифалиев
