Алатай гьафтеда Кьурагь райондин, гьакI республикадин культура, искусство вилик тухуник вичин зегьметдин ва бажарагъдин пай кутур музыкант, зуьрнечи, далдамчи Гьасен Исмаилович Исмаилов рагьметдиз фена.
Гь. Исмаилов 1933-йисуз Кьурагь райондин Шимихуьре лежбер, музыкант Исмаилан хизанда дидедиз хьана. Адан аял вахтар Ватандин ЧIехи дяведин йисарал ацалтна. Хуьрера каш гьатнавай. Женгера иштиракна, кьегьалвилерай орденар къазанмишна, залан хирер алаз кIвализ хтай Исмаил вичин вилерихъ агъуначир. КIвале ирид аял аваз фронтдиз фейи хизанда анжах уьмуьрдин юлдаш Исияни са хва ахкурла, фронтовикдивай шел кьаз хьаначир. Дердини ва сагъ хъхьун тавунвай хирери чпин кар авуна: Исмаил яргъалди амукьнач. ЦIикьвед йиса авай Гьасен са кап фу къазанмишиз, дидедин куьмекчидиз элкъвена. Адахъ галаз колхоздин кIвалахрал фена, бригадирди тапшурмишай гьар са кар тамамарна: векьер кIватIна, цанар цана, алераллаз векьер, цуьлер хкана, йигарар гатана…
Гьа са вахтунда далдам, чIагъан — дахдин ядигарар — гъиляй ахъайнач. 23 йис хьайила, Исия дидеди хциз мехъерна. Етим руш Магьиханумакай адаз рикIин мурад хьтин свас, кIвалин гьакъикъи кайвани хьана. Магьиханума сад-садан гуьгъуьналлаз кIани касдиз кьуд рушни кьуд хва багъишна. Къе виридахъ чпин хизанар, кеспияр ава, абур хуьре, КIирида, Дербентда, Махачкъалада, Къизлярда яшамиш жезва.
Ада са шумуд йисуз хуьруьн почтальонвилин везифаяр тамамарна, Хпеж дередин хуьрерин агьалийризни къуллугъна. Кьурагьиз физ — 26 километрдин рехъ атIуз, почта хкидай ва агьалийрив ахгакьардай. Газет, журнал, кагъаз, тел, посылка геж вахкай ва я квадарай са дуьшуьшни хьанач, садни ада бейкефарнач, инжиклу авунач.
ЯхцIурни цIуд йисалай виниз вахтунда Гь. Исмаилова инсанрин гуьгьуьлар шадарна. Мел-мехъерик, межлисра, концертра, юбилейрик, фестивалрани. Ада зегьметчийрин патав чуьллериз, фермайрал, карханайризни фена, далдамар яна, кьуьлер авуна, манияр лагьана, Махачкъалада, Ахцегьа, Кумухъа, Кьасумхуьрел кьиле фейи фестивалра, килигунра вичин алакьунралди тамашачияр гьейранарна.
Гьасен Исмаилова арадал гъайи хизандин ансамблди республикадин, Кеферпатан Кавказдин ва уьлкведин хизанрин ансамблрин конкурсра иштиракна, гьар жуьредин дережадин дипломар къачуна. Эхиримжи са шумуд йисуз Исмаилов ашукь хьизни машгьур хьана. Дагъустандин телевиденидай къалурай адан кьилдин концерт гзафбурун рикIел алама. Муьжуьд веледдин, къад хтулдинни кьве птулдин буба, бажарагълу музыкант, къени, шад инсан багърийрин, ам чидайбурун рикIера амукьда.
«Лезги газетдин» редакциядин коллективди Беневша, Наида Гьасеновнайриз ва вири багърийриз башсагълугъвал гузва.
