Алай йисан 14-ноябрдилай 21-ноябрдалди Россиядин вири мулкунал Экологиядин диктант кьиле тухуда. И диктант вичин бинеда тIебиат хуьнин месэлайрив эгечIдай къайдаяр чирун, агьалийрин жуьреба-жуьре къатарин арада экологиядиз талукь чирвилер раиж авун, экологиядин жигьетдай хатасузвал таъминарунин ва и рекье тахсиркарвилерин вилик пад кьунин серенжем яз, экологиядиз талукь савадлувилин дережа хкажун авай, гьар йисуз кьиле тухузвай серенжем я.
Экологиядин хиле жуван чирвилер онлайн-къайдада https://экодиктант.рус сайтдин куьмекдалди, гьакIни офлайн — жуьреда, яни и кар патал тешкилнавай гьар жуьре майданрал ахтармишиз жеда. Диктантда Россиядин Федерациядин вири субъектрин агьалийривай, гьакIни къецепатан уьлквейра яшамиш жезвай ватанэгьлийривай иштиракиз жеда.
Экодиктантдин иштиракчияр жеда: 12 йисалай гъвечIи яшда авай аялар, 12-18 йисарин яшда авай жаванар, экологиядин хиляй образование ва я и рекье кIвалахунин тежриба авай ва авачир чIехи ксар. Диктант 25 суалдикай ибарат я, ам 12 темадай тухуда: амукьаяр, кьетIендаказ хуьзвай мулкар, Арктика, яд, Байкал, гьайванрин ва набататрин алем, там, гьава, дурумлудаказ виликди фин, энергетика ва къацу финансар. Алай йисуз Экодиктантдин суалар неинки урус, гьакIни ингилис ва испан чIаларалди жеда. Экодиктант-2021 международный дережада аваз кьиле тухуда. Мярекатда иштиракун патал арзаяр СНГ-дин уьлквейрай, Венгриядай, Сербиядай, США-дай, Египетдай, Мьянмадай ва Индиядай атанва.
Вирироссиядин Экологиядин диктантда Дагъустандини иштиракда. ИкI, РД-дин образованидин ва илимдин министерстводин куьмекдалди, республикада диктант 17-ноябрдиз РД-дин илимрин гъвечIи академияда кьиле фида, хабар гузва идарадин пресс-къуллугъди.
«Лезги газет»
