Вири уьлкведа хьиз, 20-майдиз СтIал Сулейманан райондин хуьрерин мектебрани эхиримжи зенгиниз талукьарнавай шадвилин мярекатар кьиле фена. Анра муни-ципалитетдин ва хуьрерин администрацийрин, образованидин управленидин, жемиятдин тешкилатрин векилри, депутатри иштиракна.
Агъа СтIал-Къазмайрин юкьван мектебда кьиле фейи мярекатда райондин кьил Саид Темирханова иштиракна. Ада вичин рахунра къейд авурвал, цIинин кIелунин йисуз 9-класс — 608, 11-класс 227 аялди акьалтIарзава.
— Гьуьрметлу выпускникар, къе куьн патал кьетIен югъ я: куьне школа акьалтIарзава, — лагьана Саид Темирханова. — Заз квехъ ЕГЭ-да ва ОГЭ-да агалкьунар, гележегда уьмуьрда хъсанвилер хьана кIанзава. Квез чирвилер ва тербия гайи муаллимриз сагърай лугьузва за.
С.Темирханов районда образованидин хел вилик тухун патал кьиле тухузвай кIвалахрал, цIийиз эцигзавай объектрал, меценатри гузвай куьмекрални гегьеншдиз акъвазна.
Ада кIвалахда агалкьунар хьайи муаллимрив ва мектебдин уьмуьрда активвилелди иштиракай выпускникрив Чухсагъулдин чарар ва грамотаяр вахкана.
Мектеб акьалтIарзавайбуруз тебрикдин келимаяр школадин директор Жабраил Асланова, Агъа СтIалрин АСП-дин Кьил Надир Эфендиева, спортдин, туризмдин ва жегьилрин крарай Комитетдин векилри, выпускникрин сифтегьан муаллимри ва классрин руководителрини лагьана.
Гуьгъуьнлай школадин яратмишдай коллективди концерт гана.
Шадвилин мярекат эхиримжи зенг ягъуналди акьалтIна.
Хазран Кьасумов
