23-майдиз Ахцегь райондин депутатрин собранидин нубатдин сессиядал райондин кьил хкягъунин важиблу месэла гьялна. И юкъуз кьиле фейи конкурсдин комиссиядин (адан членар — РД-дин Кьилин Управленидин начальникдин заместитель Али Ибрагьимов, и Управленидин отделдин начальник Рустам Нефтялиев, РД-дин Кьилин Правовой управленидин начальникдин заместитель Арсен Фетуллаев) кьвед лагьай паюнин нетижайрикай хабардаруналди, совещание Ахцегь райондин УСХ-дин кьилин пешекар Леонард Алтуева ачухна.
Сесер гунин нетижада пуд кандидатдиз сечкийра иштиракдай ихтияр гана: Ахцегь райондин кьилин везифаяр тамамарзавай Роберт Гьамзаеваз, райондин депутатрин собранидин председатель Абдул-Керим Палчаеваз, Ахцегь райондин кьилин заместитель Фатима Агьмедовадиз.
Депутатри сесер гуналди, Ахцегь райондин кьилин къуллугъдал А.-К. Палчаев хкягъунин къарар рейсадвилелди кьабулна.
Вирибуруз сагърай лугьуналди, А.-К.Палчаева къейдна: “Чун са чIехи десте я. Хайи райондин абадвал патал, анжах виликди финалди, вири макьсадарни тапшуругъар кьилиз акъудиз, санал мадни гзаф зегьмет чIугуна кIанда…”.
“Лезги газетдин” редакциядин коллективди Абдул-Керим Палчаеваз чIехи ва жавабдар къуллугъдал хкягъун мубаракзава.
«ЛГ»
