Чи ватанэгьлияр — гьар сана
Хуьруьн мектебда кIелай лезги руша Дагъустандин государственный университет яру диплом къачуналди акьалтIарун, гуьгъуьнлай уьлкведин меркезда кIвалахун, вини дережадин пешекар хьун регьят кар туш. Ихьтин дамахлу крар акьалтIай алакьунар авайбурулай алакьда. Къе чаз вичикай суьгьбет ийиз кIанзавай, ери-бине Кьасумхуьрелай тир Эльмира Меликовадилай хьиз.
Эльмира 1990-йисан 16-майдиз Эдуард Идаятович ва Замира Салигьовна Меликоврин хизанда дидедиз хьана. 2007-йисуз ада Кьасумхуьруьн 1-нумрадин юкьван мектеб лап хъсан къиметралди акьалтIарна. КIелунин ва ахлакьдин жигьетдай виридаз чешне хьайи Эльмирадин шикил, 5-классдилай эгечIна, мектебдин гьуьрметдин доскада хьана. И йисара ада са шумудра райондин ва республикадин олимпиадайра кIвенкIвечи чкаяр кьуна.
2007-йисуз Э.Меликова Дагъустандин государственный университетдин химиядин факультетдин фармацевтикадин отделенидик экечIна. Студент тир йисарани ада университетдин общественный уьмуьрда, Вирироссиядин студентрин ва жегьил алимрин конференцийра активвилелди иштиракна, ам гзаф кьадар сертификатриз ва дипломриз лайихлу хьана.
Э. Меликовади 2012-йисуз ДГУ яру диплом къачуналди куьтягьна. 2012-йисалай 2013-йисалди жегьил пешекарди Махачкъала шегьерда аптекайрин “Целитель” хиле, гьа са вахтунда Р.Аскерханован тIварунихъ галай Дагъустандин базовый медицинадин колледжда педагогвиле кIвалахна, “Фармацевтическая технология” ва “Управление и экономика фармации” предметрай тарсар гана. 2013-йисуз Эльмира Эдуардовна Москвадиз фена, “А5” аптекайрин хиле фармацевтвиле кIвалахал акъвазна.
2016-йисуз Э. Меликовади Р.Аскерханован тIварунихъ галай Дагъустандин базовый медицинадин колледж тафаватлувилелди акьалтIарна, “Фармацевт” пешекарвал къачуна. Гьа и йисуз кьетIен чирвилер ва алакьунар авай лезги руш, “36,6” аптекайрин хилез фена, чIехи администратордин къуллугъдал акъвазна.
2019-йисуз Эльмира Меликовадиз Москвада “Экономика и управление в фармации” пешекарвални гана. А чIавалай къенин йикъалди ада “36,6” аптекайрин зурба хиле чирвилер гудай мобильный 1-нумрадин дестеда бизнес-тренер яз кIвалахзава.
2019-2020-йисара Эльмира Эдуардовнади “36,6” компаниядин виридалайни хъсан тренер лагьай тIварни къачуна. Ада уьлкведин меркезда ва маса субъектра тухузвай пешекарвилин конкурсра, интеллектуальный къугъунрани иштиракзава, анра кIвенкIвечи чкаяр кьазва. ИкI, алай йисуз “36,6” аптекадин провизор Виктория Покрашенкодихъ, тренер-провизор Елена Дейнекодихъ, “ГОРЗДРАВ” аптекадин фармацевт-насигьатчи Ольга Гришинадихъ галаз санал тренер-провизор Эльмира Меликовади фармацевтринни провизоррин интеллектуальный “Профессионалы RX” къугъуна гъалибвал къачуна.
— Чи пешеда жуван чирвилер гьар юкъуз цIийи хъувун чарасуз я, — лагьана Э.Меликовади интеллектуальный къугъуна гъалиб хьайидалай гуьгъуьниз журналистрихъ галаз авур суьгьбетда. — За гзаф кIелзава, жува жувал ва жуван гъалатIрал кIвалахзава. За чи компанияда тухузвай жуьреба-жуьре тренингра иштиракзава, цIийи чирвилер къачун патал алава чешмеяр ишлемишзава. За вирибуруз конкурсра, интеллектуальный къугъунра иштирак авун меслят къалурзава. Им жуван чирвилер синагъдай ва мадни артухардай хъсан мумкинвал я. Къастунал кIевивили, уьмуьр хъсан жедайдахъ инанмишвили гьар са касдиз мадни виниз тир дережадиз хкаж жез куьмекда.
Лезгистандин тIвар виниз хкажзавай лезги руш чаз мадни вини дережайрив агакьна кIанзава.
Асият Мирзалиева,
Хазран Кьасумов
