(Мавлудин Хаирован — 65 йис)
Дуьньядин винел гьар са пешедай Аллагьдин патай верги ганвай инсанар тIимил алач. Садбурукай летчикар, спортсменар, алимар, масадбурукай муаллимар, шаирар, писателар, художникар, композиторар ва маса пешейрин иесияр жезва ва абуру чпин вири къуватар датIана халкь, иллаки жегьил несил паталди серфзава. Гьа ихьтин ксарикай сад августдин вацра вичин 65 йисан юбилей къаршиламишиз гьазурвилер аквазвай бажарагълу композитор ва муаллим Мавлудин Гьамзабегович Хаиров я.
М.Хаиров 1956-йисан 14-августдиз Ахцегь райондин Хкемрин хуьре дидедиз хьана. 1972-йисуз юкьван мектеб акьалтIарайдалай кьулухъ гележегдин композитор Махачкъаладин Г.Гьасанован тIварунихъ галай музыкадин училищедиз гьахьна. Училище акьалтIарай 1976-йисуз Мавлудин Хаиров Астрахандин госконсерваториядин дирижервилинни хордин факультетдиз гьахьна.
Консерватория акьалтIарай 1981-йисуз Мавлудин Дербентдин музучилищедиз кIвалахал ракъурзава. Училищедин хордин руководителвиле ада къенин йикъалди зегьмет чIугвазва.
2014-йисалай композиторди Дербентдин аялрин 1-нумрадин музшколадин директор язни кIвалахзава.
Гзаф йисара М.Хаирова “Еке хор”, “Камерный хор” тIварар алай яратмишунрин коллективриз регьбервал гана, жуьреба-жуьре коллективрихъ галазни кIвалах тухвана.
Чи милли меденият, музыкадин искусство вилик тухуник Мавлудин Хаирова лайихлу пай кутазва. Республикадин конкурсра, фестивалра иштиракунай М.Хаиров, регьбер хьиз, гзаф дипломризни грамотайриз лайихлу хьана.
Композитор гьакIни лезги милли культура ахтармишун ва вилик тухун патал тешкилзавай мярекатрин, фестивалрин ва конкурсрин тешкилатчи ва активный иштиракчи я.
2000-йисуз А.Пирсаидован мергьяматлувилин куьмекдалди Мавлудин Хаирован “Лезги халкьдин манияр ва кьуьлердай макьамар” ктаб чапдай акъатна.
М.Хаирова алай вахтунда Россиядин жуьреба-жуьре шегьерра: Москвада, Тюменда, Сургутда, Астраханда, Дагъустандин Огнида, Кьиблепатан Дагъустандин районра ва масанра кIвалахзавай вичин ученикрал дамахзава.
Мавлудин муаллимдин къелемдикай жуьреба-жуьре жанрайрин вишелай виниз эсерар хкатнава. Абурун арада хор, вокалдин ансамблар, солистар патал яратмишунар, халкьдин манийрин обработкаяр ва аранжировкаяр ава. М.Хаирован яратмишунар музыкадин училищедин коллективрин, Лезгийрин СтIал Сулейманан тIварунихъ галай муздрамтеатрдин, музыкадин мектебрин, солистрин, халкьдин алатрин оркестрдин репертуарра гьатнава.
Композитордин яратмишунрикай чавай С.Рамазанован “КьепIир Айисат”, Р.Гьамзатован “Дагъви дишегьли” мюзиклар, Г.Хугаеван “Зи ирандиде”, А.Атаеван “Агь, а варз алай йифер”, М.Шамхалован “Гъуьлуьн диде”, “Малла Нисредин”, “Часпар”, “Аюхар” тамашайриз, “Нефс”, “Зиярат” драмайриз кхьенвай гьавайрин, какахьай хор ва оркестр патал “Бахтавар” сюитадин, “Хуьре пакама”, “Дербентдикай мани”, “Россия — зи Ватан”, “Дербентдин гимн” ва гьакIни “Хкемар”, “Калукар”, “Лезги гьава”, “РикIин тIал”, “Лагь, билбил”, “Камила”, “Рахазмач яр”, “Дидедиз” манийрин тIварар кьаз жеда.
Мавлудин Гьамзабеговича гьакIни лезги халкьдин манияр, чи машгьур бязи композиторрин эсерар обработка авуна.
Дагъустан Республикадин культурадин лайихлу работник Мавлудин Гьамзабегович Хаирова милли меденият вилик тухунин рекье зегьмет чIугунин, чIехи жезвай несилдиз музыкадин искусстводин сирер чирунин кIвалах давамарзава.
За Мавлудин муаллимдиз 65 йисан юбилей рикIин сидкьидай мубаракзава. Адахъ чандин сагъвал, уьмуьрда ва яратмишунра мадни еке агалкьунар хьун зи мурад я.
Эдуард Ашурагъаев
