И йикъара Кьурагь райондин физкультурадинни спортдин ва жегьилрин крарин рекьяй отделди кьурагьви хсуси карчийрихъ галаз санал райцентрада мини-футболдай 4-турнир кьиле тухвана. Идакай “Лезги газетдиз” райадминистрациядин пресс-къуллугъди хабар гана.
Дуствилин “Санал” кубок патал тешкилай турнирда Кьурагь райондин хуьрерин жегьил футболистрин командайри иштиракна. Къейдзавайвал, акъажунра иштиракзавай командайрин кьадар гьар йисуз артух жезва. ЦIи 16 командади (Кьурагьрин, КьепIиррин, КIирийрин, КIутулрин, Гелхенрин, Хпежрин, Ашарин, Кумухдин…) иштиракна.
Къугъунриз гьахълудаказ къимет гун патал къуншидаллай СтIал Сулейманан райондай судьядиз теклифнавай. Турнирдин сейли мугьманрин арада тхэквондодай олимпиададин чемпион Радик (Абдурагьим) Исаев, спортдин и жуьредай чIехи устад Малик Исаев, каратэдай 2 сеферда дуьньядин чемпион Шамил Рамазанов авай.
Финалдин паюна “Кьурагь” командади “Лекьер” командадин винел гъалибвал къачуна. Хъсан чкаяр кьур командайриз, тафаватлудаказ къугъвай кьилдин футболистриз кубокар, медалар, грамотаяр, пулдин ва маса пишкешар гана.
«Лезги газет»
