1-апрелдиз “Лезги газетдин” амадагрикай сад, гьар йисуз газет кхьинин кардик лайихлу пай кутазвай чи ватандаш, “Дагестанский” ФГБУ ГЦАС-дин (государственный центр агрохимической службы) директор Магьамедзакир Мегьамедтагьирович Къадималиева вичин уьмуьрдин 60 лагьай гатфар къаршиламишна. Диде-буба, амай багъриярни ярар — дустар ачух суфрайрихъ кIватI хьана.
“Бубайрин крариз вафалу, абурун баркаллу рехъ давамардай кьегьал хва хьурай!” лугьуда лезгийри, хизанда эркек велед хьайила. Кьегьал рухваяр неинки диде-бубадин кьилин винизвал я, абур, шаксуз, хайи хуьруьн, дередин дамахдизни элкъведа. Къе вичин юбилей къейдзавай Магьамедзакир Мегьамедтагьировични КIварчагъ дередин кьегьал рухвайрикай сад я лугьуз жеда.
Магьамедзакир Къадималиев Сулейман-Стальский райондин КIварчагърин хуьре зегьметкеш хизанда дидедиз хьана. Бубадини дидеди чпин веледар гъвечIи чIавалай зегьметдал рикI алайбур, халкьдиз вафалу халис инсанар яз тербияламишна. Виридаз кьилин образование гана. М.Къадималиева хуьруьн юкьван школа акьалтIарна. 1981-1983-йисара Ватандин вилик буржи тамамарна.
РикIе кьакьан кукIушар муьтIуьгъардай къаст авай жегьилди кьилин образование къачун кьетIна. Ам Махачкъалада Дагъустандин хуьруьн майишатдин институтдик экечIна. Зегьметдин рехъ республикадин набататар хуьдай станцияда агрономвиле кIвалахунилай башламишна. 1999 -2005-йисара ада “Дагестанский” ГЦАС-да кьилин пешекарвилин, 2006-йисалай чилик, накьвадик химиядин такьатар ишлемишун тешкилдай отделдин начальниквилин везифаяр кьилиз акъудна. 2007-йисалай инихъ, винидихъ къейднавайвал, ада и центрадиз регьбервал гузва. Магьамедзакир Мегьамедтагьировича гьа са вахтунда илимдин кIвалахдин винелни зегьмет чIугуна. Нетижада 2005-йисуз Кабардино-Балкариядин госсельхозакадемияда ада аспирантура акьалтIарна. Гьа и йисан ноябрдиз диссертация (тема: “Влияние видов удобрений на плодородие почвы и продуктивность винограда в Приморской низменности Дагестана”) агалкьунралди хвена, хуьруьн майишатдин илимрин кандидатвилин тIвар къачуна. Ам агрономиядин хиляй хейлин публикацийрин автор, ДагГАУ-дин экзаменационный Госкомиссиядин председателни я. РД-дин хуьруьн майишатдин министерствода ва гьукуматдин дережада аваз кьиле тухузвай вири совещанийра докладар ийизва. Вичи регьбервал гузвай идаради кьиле тухузвай кIвалахдикай (кьилин везифа — накьвадин гьал ахтармишун, хуьруьн майишатда зегьмет чIугвазвайбуруз гьалдикай хабар, ам кьенятдаказ ишлемишунин жигьетдай меслятар гун, миянардай шейэр вегьинал гуьзчивал тухун ва икI мад. Гьар йисуз 100 агъзур га чилер ахтармишзава, къалабулух кутазвай месэлайрикай (абурни, гьайиф хьи, авачиз туш) датIана хабардарзава.
“Ам уьмуьрда секинвал чидай кас туш”, — лугьуда гзаф вахтара чна, датIана кардик, кIелунрик квай, кIвалахдин яцIа авай ксарикай рахадайла. Мукьувай таниш хьайила, Магьамедзакир Мегьамедтагьировични заз ахьтин кас тирди субут хьана. Ихьтин ксарал, абурун агалкьунрал хъсан инсанри шадвалда, чIуру рикIер авайбуру — пехилвал. ЧIехи коллективдиз регьбервал гун, жуьреба-жуьре къилихрин ва миллетрин векилар битавламишна, кIвалах къайдадик кваз тешкилун, зегьмет чIугвазвайбур патал къулай шартIар яратмишун (центр кардик квай дарамат хъсандиз ремонтнава, лаборатория патал лазим тадаракар маса къачунва ва икI мад) регьят кар туш. М.Къадималиева вири и крар бажарагълудаказ кьилиз акъудзава.
Гьакъисагъ зегьметдай ам РД-дин хуьруьн майишатдин лайихлу работник, Росссиядин агропромышленный комплексдин гьуьрметлу работник, гьуьрметлу агрохимик тIварариз, министерстводин ва гьукуматдин хейлин шабагьриз лайихлу хьанва.
Магьамедзакир Къадималиев, хъсан регьбер хьиз, чешнелу хизандин кьилни я, Каспийск шегьерда кIвал-югъ кутуна яшамиш жезва. Вичин уьмуьрдин юлдаш, Каспийск шегьердин аялар хадай кIвале гьакъисагъвилелди зегьмет чIугвазвай медсестра Миная Мирзеагъаевнадихъ галаз санал абуру 3 хва чIехи авунва. Кьве хцихъ чпин хизанар хьанва, абурун бицIекри чIехи бубадинни чIехи дидедин рикIер шадарзава. Кьилди къачуртIа, чIехи хва Замира ДагГАУ ва правовой колледж акьалтIарна, экономиствилин ва юриствилин пешеяр къачуна, республикадин гьукуматдин патав гвай закупкайрин рекьяй комитетда кIвалахзава. Бубадин рехъ давамарзавай Камила хуьруьн майишатдин илимрин кандидатвилин тIвар къачунва, Россельхознадзорда отделдин начальникдин заместитель яз зегьмет чIугвазва. ГъвечIи хва Ислама, ДГУ-дин экономикадин факультет акьалтIарна, заочнидаказ аспирантурада кIелунар давамарзава, Каспийскдин администрацияда ЖКХ-дин рекьяй кьилин экономист яз кIвалахзава.
“Лезги газетдин” редакциядин коллективди регьбервилин, бубавилин ва чIехи бубавилин везифаярни лайихлудаказ кьилиз акъудзавай инсанперес Магьамедзакир Мегьамедтагьировичаз 60 йисан юбилей рикIин сидкьидай тебрикзава. Къуй Куь уьмуьр сагъламди, хушбахтлуди, рикIик квай планар кьилиз акъуддай къуватралди девлетлуди хьурай! 80, 90, 100 йисарин юбилеяр гьеле вилик кума!
Рагнеда Рамалданова
