Чи ватанэгьлияр — гьар сана

Кьисметди жуьреба-жуьре шегьерриз, уьлквейриз акъуднавай лезгийрин кьадар тамамдиз лугьуз­ хьун четин я. Бязи чкайра гьатта ви-шералди чи ватанэгьлияр яшамиш жезва, абуру чеб лайихлу, савадлу ва вири рекьерай-хилерай кар алакьдай пешекарар тирди успатзава. Чпин арада дуствилин ала­къа­яр хуьналди, халкьдин векилри­ чеб авай чкайра милли диаспораяр, кьилдин тешкилатар арадал гъиз­ва. Кьилинди, чеб лезгияр тирди вирибуруз краралди чирзава, халкьдин тIвар хкажзава…

Украинадани фадлай яшамиш жезвай лезгияр тIимил авач. Кьил­ди­ къачуртIа, Харьков шегьердай чав вилик-кьилик квай лезгийрикай, абурун кIвалахрикай, кьиле ту­хузвай милли мярекатрикай мукьвал-мукьвал шад хабарар агакьзава. Чаз малум тирвал, Харьковда лезгийрин “Самур” тIвар алай кIва­тIални кардик ква.

Вичикай ихтилат физвай Саид Хан  Азизагъаевич  Рагьимовни Украинада авай ватанэгьлийрин арада машгьур лезгийрикай сад я.

Ам 1957-йисан 10-июлдиз Кьурагь райондин Хуьрехуьре муаллимдин хизанда дидедиз хьана. Адан буба Азизагъа Азимовича гзаф йисара урус чIаланни литературадин муаллимвиле кIвалахна. Иркутскдин медучилище акьал­тIар­навай диде Анна Петровнади медсестра яз кIвалахна.

Саид Хан Азизагъаевича 1964-йисуз мектебдиз сифте камар къа­чу­на. 1967-йисуз залзала хьайидалай кьулухъ абур Мегьарамдхуьруьн райондин КьепIир-Къазмайрин хуьруьз куьч хьана. Ина мектебда кIе­­лун давамар хъувуна. Инсти­тут­дик­ экечIунин мураддалди 1975-йи­суз ам ватанэгьлияр авай Харьковдиз фена. Амма сифтедай макь­сад­див агакьдай мумкинвал хьанач — гьа йисуз адаз Ватандин вилик хи­ве авай буржи тамамарун патал Со­­ветрин Яракьлу кьушунриз эверна.

1977-йисуз старшинадин чинда аваз армиядай Харьковдиз хтай Саид Хан В.И.Ленинан тIварцIихъ галай ХПИ-дик (Харьковдин политехнический институт) экечIна. КIе­лунихъ галаз сад хьиз, ватанэгьли­ди Харьковдин машиностроительный заводда (“ФЭД”) кIвалахн­и аву­на. Зегьметдин рехъ ада механосборочный кIвалахрин слесарвилелай башламишна. Институт куьтягьна, кьилин образование къачурдалай кьулухъ (1985-йисуз), кIва­лахда тежриба хьанвай пешекар къуллугъдин рекьяй хкаж хьана: устIар участокдин начальниквиле тайинарна.

Гуьгъуьнлай агъзурралди ватандашрин уьмуьрда дегишвилер тур алаш-булаш девир алукьна. 1991-йисуз хсуси карчивилел машгъул хьунив эгечIай Саид Хан Рагьимова и кIвалах 2001-йисалди давамарна.

2001-2012-йисара ада хъвадай затIар, шахтаяр патал тадаракар маса гунин, маргарин арадал гъунин алишверишда кIвалахна.

2012-йисалай инихъ “Электромашина” заводда зегьмет чIугваз­ва.  ЧIехи заводда ада сифте техни­кадин рекьяй цехдин начальникдин заместителвиле, гуьгъуьнлай цехдин начальниквиле кIвалахна. Еке алакьунар ва кIвалахдин тежриба хьанвай ватанэгьлиди 2017-йисалай инихъ производстводин рекьяй­ директордин къуллугъдал кIвала­хун давамарзава. Къейд ийин, и за­водда ракьун рекьин  транспортдин ва кранрин двигателар, хейлин ма-са тадаракар  арадал гъизва.

Саид Хан Рагьимова уьмуьрдин юлдашдихъ галаз санал рушни хва чIехи авунва. Исятда ам  кьве хтулдин чIехи буба я. Къуй чи ватанэгьлийрихъ мягькем сагъвал ва кIвалахра анжах агалкьунар хьурай!

К. Ферзалиев