Россельхознадзордин РД-да авай Управлениди майишатар кIвалин гьайванар республикадин къене санай масаниз улакьда аваз, я тахьайтIа, яхдиз, абур уьлкведин маса регионриз тухунин рекьерикай идарадиз виликамаз хабар гуниз мажбур тирдакай тагькимарзава. Идакай Управленидин пресс-къуллугъди хабар гузва.
“РФ-дин “Ветеринариядин гьакъиндай” Закондин 13-статьядик дегишвилер кухтурдалай кьулухъ гьайванар санай масаниз улакьда аваз, я тахьайтIа, яхдиз тухунин кIвалах федеральный государстводин ветеринарный гуьзчивал тамамарзавай органри разивал ганвай рекьерай, гьайванрик акатдай азаррикай хуьнин истемишунрални амал авуна, тамамарун лазим я”, — лугьузва малуматда.
Идарадин векилдин гафаралди, къанундин истемишунрал амал тавунай административный ва я уголовный жавабдарвилиз чIугун фикирда кьунва.
“Гьайванар санай масаниз тухунин рекьерин гьакъиндай хабар гузвай арзада агъадихъ галай делилар хьун лазим я: майишатдин тIвар ва ам алай чка; санай масаниз тухузвай гьихьтин ва гьикьван гьайванар аватIа, гьадакай делилар; гьайванар масаниз тухунин макьсаддикай малумат.
Арза ракъурун лазим я: тукIваз кIанзавай гьайванриз талукь яз — машинрай авудиз башламишдалди вилик квай кIвалахдин пуд йикъан вахтунда; жинсинин, циркинин гьайванриз талукь яз — карантиндин мярекатар куьтягьдалди кIвалахдин вад югъ амаз”, — къейдзава пресс-къуллугъди.
Чи мухбир
