И йикъара Кьасумхуьрел чкадин телевиденидин студияда лезгийрин тIвар-ван авай шаир, публицист ва таржумачи Пакизат Фатуллаевадин “Лезги гьарфар” ктабдин презентация кьиле фена.
Аялар патал кхьенвай цIийи ктабдикай “элкъвей столдихъ” телевиденидин корреспондент Мизамудин Магьмудова, “Куьредин ярар” медениятдин центрадин регьбер Агьмедпаша Агьмедпашаева, Каспийск шегьерда яшамиш жезвай шаир, рубаийрин устад Саират Агьмедпашаевади, Агъа СтIал-Къазмайрин аялрин “Чубарук” бахчадин тербиячи-методист Тамила Куругълиевади, Кьулан СтIалрин юкьван школадин лезги чIалан ва литературадин муаллимар тир Маржанат Тагьировади, Къизханум Алимовади, Вини СтIалрин юкьван школадин муаллим, шаир Минаят Муталибовади чпин фикирар лагьана, ктабда гьатнавай эсерар кIелна, абуруз баянар гана. Абуру къейд авурвал, Пакизат Фатуллаевадин “Лезги гьарфар” ктаб гъвечIи аялар, абурун муаллимар ва диде-бубаяр патал герекди я.
Кьилди къачуртIа, аялрин бахчадин тербиячи Тамила Куругълиевади лагьайвал, “Лезги гьарфар” аялрин бахчаяр патал чарасуз герек я, гьикI лагьайтIа, ктабда гьатнавай эсерри ва абуруз талукь яз чIугунвай шикилри, ганвай баянри гъвечIи аялриз лезги гьарфар, гафар кIелиз-кхьиз чируниз, бахчайрин тербиячийриз бицIекрихъ галаз кIвалах тешкилуниз куьмекда.
Саират Агьмедпашаевади къейд авурвал, аялар патал эсерар кхьизвай, ктабар акъудзавай шаирарни писателар лезгийрихъ лап тIимил ава. Гьавиляй Пакизат Фатуллаевадин “Лезги гьарфар”, “Пси-пси псайди”, “Лезги халкьдин махар” ктабрин метлеб гъвечIи кIелчияр патал екеди я. Абур неинки аялрин бахчайра ва школайра, гьакI лезги гьар са хизандани хьун чарасуз я.
Къейд ийиз кIанзава, алай йисан 1-июндиз аялар хуьнин Международный йикъаз талукь яз “Там-Там” кафеда тухвай мярекатдал Пакизат Фатуллаевадин “Пси-пси псайди” ктабар 20 аялдиз пулсуздаказ гана.
Авторди “Лезги гьарфар” 60 ктаб СтIал Сулейманан районда кардик квай аялрин 13 бахчадиз пулсуз пайна. Ихьтин мергьяматлу кIвалахдай аялри ва абурун диде-бубайри Пакизат Фатуллаевадиз чухсагъул лугьузва.
Хазран Кьасумов
