РД-да авай Россиядин ФСБ-дин ва республикадин МВД-дин къуллугъчийри Махачкъаладин образованидин идарайриз къурхуяр гузвай электронный чарар ракъурай жегьил вуж ятIа тайинарнава.
МВД-дин пресс-къуллугъдин делилралди, Махачкъаладин мектебрикай сана кIелзавай 15 йисан яшда авай ученикди вичи авур кар акьулсузвилинди ва зарафатдинди я лагьана. Аквадай гьаларай, жегьилди вичи авур нагьакьан кардай уголовный жаза къвезвайдакай фикирнач. Ихтилат РФ-дин УК-дин “Терроризмдин актуникай къастуналди тапан малумат гун” 207-статьядикай физва.
Полициядин отделдиз ам бубани галаз тухвана. Ученикди ракъурай электронный чарар себеб яз, шегьердин мектебрай аялар, муаллимар тади гьалара акъуднай. Къейдзавайвал, нагьакьан кар авур гада тамам хизанда тербияламиш жезва ва ПДН-дин учетра авач.
“Жегьилди и кар текдаказ кьилиз акъуднавач лугьудай делиларни ава. Информация ахтармишун ва процессуальный къарар кьабулун патал материал кIватIунин кIвалах кьиле физва”, — алава хъувуна МВД-дин пресс-къуллугъди.
«Лезги газет»
