“Хоттабычар вахари” Европада виридалайни кьакьанда авай Къурушрин хуьруьн агьалийриз куьмекна. Кьве руша, Евгениядини Фаридади, Дагъустанда “Гамунал-самолетдал алаз Хоттабычар вахарин сиягьат” тIвар алай цIийи проектдик кьил кутунва. Рушар чеб Дагъустандай туш, амма чи республикадиз атана са шумуд йис я. Жуьреба-жуьре чкайрихъ галаз таниш хьайидалай кьулухъ рушариз Дагъларин уьлкве рикIивайни хуш хьана. Абуру Дагъустанда дидевилизни аялвилиз куьмекар гудай “Дагълара авай чими кIвал” центр ачухна.
Чаз малум хьайивал, гзаф аялар авай хизанриз, яшайишдин жигьетдай четин гьалда авай, кIвачерал залан дишегьлийриз, ялгъузбуруз мергьяматлувилин ва психологиядин рекьерай жуьреба-жуьре куьмекар гуз 4 йис я. Лап четин гьалара авай, аялар галай дишегьлияр кьабулдай гъвечIи кIвални ава.
Алай вахтунда “Хоттабычар вахар” Дагъустандин дагълух хуьрериз физва. ИкI, нубатдин сеферда абур Докъузпара райондин Къурушрин хуьруьз фена.
— Чун Къурушрин ажайиб тIебиатди суьгьуьрда туна. Рагарни дагълар, чарчарар, булутар… Чкадин мектебдин математикадин муаллим Гуляди чаз Шалбуз дагъни къалурна, — ихтилатзава Фарида Бахшиевади.
Проектдин тешкилатчийри Къурушрин хуьруьн игьтияж авай бязи хизанриз кIвале герек къведай затIар пишкешна.
Чи мухбир
