10-мартдиз Дагъустандин Халкьдин Cобранидин депутат, «Возрождение Дербента» фондунин тешкилатчи Имам Яралиев, Россиядин Игит Муслим Муслимован экуь къамат гьуьрметдалди рикIел хкиз, Белиж поселокдиз мугьман хьана.
Имам Яралиев сифте нубатда Игитдин сурал фена, анал дуьа авуна, гуьмбетдал цуьквер эцигна. Гуьгъуьнлай ада Муслим Муслимован хизандал кьил чIугуна. Ада Муслимоврин хизандиз башсагълугъвал гана ва Ватандин аслу туширвал патал чан къурбанд авур кьегьалдин хизан герек крара куьмек авачиз амукь тийидайди къейдна.
«Куь хва Муслиман кьегьалвилер чи рикIелай садрани алатдач. Адан жуьрэтлувал ва игитвал чи рикIера эбеди яз амукьда», — лагьана депутатди.
— Дагъустан халис игитрин Ватан я, — давамарна Имам Яралиева вичин рахунар. — Гьамиша хьиз, рамазандин вацрани Украинада кьиле физвай серенжемда иштиракзавайбурун гьакъиндай къайгъударвал авун важиблу я.
Гьайиф хьи, дяведа магьрумвилерни жезва. Хажалат хьанвай гьар са хизандиз куьмек гуз мукьва-кьилияр, багърияр, санал къуллугъ авурбур, яшайишдин къуллугърин векилар къведа. Гьукуматдини фикир тагана садни тазвач. Хизанри дерт чIугвазвай вахтунда абурун къвалав хьун ва алакьдай куьмекар гун важиблу я. ИкI чун санал къуватлу ва мягькем жеда. Чи буржи куь патав хьун я. Чна чи игитрин дидейрини уьмуьрдин юлдашри чеб кьилди тан тийизвайди, къуьн кутазвайди гьиссдайвал авуна кIанда, — къейдна И. Яралиева.
Имам Музамудиновича «Возрождение Дербента» фондунин тIварцIихъай рагьметлу Игитдин хизандиз 2 миллион манатдин кьадарда аваз пулдин куьмек гана. Къейд ийин хьи, Игитдин аяларни (кьве руш) рикIелай ракъурнавачир, абуруз вижевай савкьатар ва ширинлухар пишкешна.
Гуьруьшдин эхирдай Игитдин буба Жавид Муслимова хизандиз четин арада куьмек гунай Имам Яралиеваз сагърай лагьана.
Кьегьал рухвайрикай магьрум хьанвай хизанра ихьтин гуьруьшар тухунихъ еке метлеб ава, гьикI лагьайтIа, хажалат хьанвай хизанри игитар рикIелай алат тавунвайди, абурун багърийрихъ далу галайди ва дикъет гузвайди гьиссдайвал авун важиблу я.
Къагьриман Ибрагьимов
