Сергей Меликова Президент регионда уьмуьрдиз кечирмишзавай проектрикай ва жуьреба-жуьре хилера къазанмишнавай агалкьунрикай хабардарна. Республика яшайишдинни экономикадин рекьяй вилик финиз талукь месэлаяр гьялай гуьруьшдин нетижадиз талукь яз Сергей Меликова ихьтин баянар гана.
«Къе за чи Президент Владимир Владимирович Путиназ Дагъустан гьикI яшамиш жезватIа, чахъ гьихьтин агалкьунар аватIа ва инлай кьулухъ вуч авуна кIанзаватIа, гьадакай малумат гана. Лап кар алай месэлайрикай – чи инсанрикай, экономикадикай, хъсанвилихъ гьихьтин дегишвилер жезватIа, гьабурукай рахана.
Чаз виридаз чизва уьлкведин Президентди Дагъустандиз гьихьтин къимет гузватIа. 1999-йисан вакъиайрилай гуьгъуьниз ам республикадихъ галаз хъсан алакъада ава. А вахтунда къазанмишай гъалибвал чи умумиди я. Ам республикадив эгечIзавай тегьердикай гьар са ихтилатдай аквазва. Президентдиз республика вилик фена кIанзава, ада чи проектрин тереф хуьзва.
Верховный Главнокомандующийдиз за дяведин махсус серенжемдин иштиракчийриз ва абурун хизанриз гузвай куьмекдикайни ихтилатна. Лап сифтедилай чун куьмекиз алахънава: СВО-диз мергьяматлувилин 41 тонн парар рекье туна. Аник техника, алукIдай партал, суьрсет акатзава. Вири гъалибвал патал я. СВО-дин иштиракчийрин хизанриз куьмекзава, кьезилвилер ийизва, яшайишдин жуьреба-жуьре месэлаяр гьялзава. Женгерин майданрилай кIвалериз хтайбуруз ислягь зегьметдив эгечI хъийидай мумкинвал яратмишзава. Регионда «Дагъларин гьунарлувал» программа кардик ква. Адан 7 иштиракчи гьеле жуьреба-жуьре къуллугърал тайинарнава.
Дагъустанди эхиримжи 5 йисуз яшайишдинни экономикадин вири терефрай вилик фин, артмиш хьун таъминарнава. Промышленностдин алай аямдин 12 кархана, цIийи 111 школа, аялрин 97 бахча, 122 ФАП ачухнава. 374 школа, аялрин 63 бахча, здравоохраненидин 329 дарамат ремонтнава. Медицинадин идараяр патал 3 агъзурдалай виниз цIийи тадаракар къачуна.
Президентдиз гьар йисуз кьакьан бегьерар къачузвай чи аграрийрин агалкьунрикайни лагьана. Шаз 295 агъзур тонн емишар кIватIна. СКФО-дин регионрин арада бегьерлувал хкажунин рекьяй виридалайни чIехи нетижа къалурна. Чна хуьруьн майишатдин кар алай хел тир уьзуьмчивални вилик тухузва. Алатай йисуз 302 агъзур тонн ракъинин кагьрабаяр вахчуна.
Владимир Владимировичахъ галаз кьиле фейи суьгьбетдин вахтунда целди таъминарунин, туризмдин, зирзибилдикай михьунин, рекьерин, агьалияр чкIизвай кIвалерай акъудунин, спорт, культура вилик тухунин, жегьилриз тербия гунин месэлайрикайни рахана. Са бязи крар, лугьудайвал, михьи чарчелай гатIунна, бязи вахтара алатай йисарин харапIаяр къайдадиз хкуниз мажбур хьана. Чна къачунвай гьерекат хъсанди я ва къазанмишнавайдал акъвазизни кIанзавач.
Гьелбетда, чун рикIик секинсузвал кутазвай месэлайрикайни рахана. Сифте нубатда — республика электроэнергиядалди таъминаруникай. Куьгьне сетар къайдадиз хкунихъ галаз сад хьиз, чна цIийи хилерни кардик кутазва. «Къацу» энергия кардик кутунал гьалтайла, республика Россияда кIвенкIвечийрин жергеда ава. Чна ракъинин, гарун станциярни кардик кутазва, республикадиз инвесторарни къвезва.
Гьамиша хьиз, гилани государстводин Кьили тамамвилелди чи тереф хвена. Гьавиляй заз адаз рикIин сидкьидай сагърай лугьуз кIанзава. Президентдиз чи ван къвезва ва чал ихтибарзава. Чна йисаралди къарагъариз хьайи хейлин месэлаяр чкадилай юзурнава. Мукьвал вахтара Дагъустандин гьар са хизан патални абурухъ хъсан нетижа жеда.
Вири дагъустанвийрин тIварунихъай заз Владимир Владимировичаз республикадиз датIана гузвай куьмекдай сагърай лугьуз кIанзава», — къейдна Сергей Меликова.
Хийир Эмиров
