Кьиблепатан территориальный округда Дагъустан Республикадин Кьилин патай тамам ихтиярар авай векил Энрик Муслимов ва Сулейман-Стальский райондин кьил Нариман Абдулмуталибов Сардархуьре эцигнавай аялрин цIийи бахчадиз фена. 

2016-йисан майдиз аялрин бахчадин дараматдин хандакIдиз сифте къван вегьенай. 60 аялдиз чкаяр аваз типовой проектдай дарамат и хуьруьнви, Махачкъалада яшамиш жезвай карчи Сагьиб Алимован хсуси такьатрихъ эцигна.

Дараматдиз, гьаят аваданламишнавай гьалдиз тамашай Энрик Муслимов ва Нариман Абдулмуталибов инанмиш хьайивал, аялрин бахчада вири жуьредин шар­тIар яратмишнава: аялар къугъвадай, ксудай ва абуру ял ядай кIва­лер, пищеблок хъсандиз тадаракламишнава, видеогуьзчивилин, пожарный сигнализациядин тадаракар эцигнава, пек-лек чуьхуьдай чка, гьакIни санузел кардик ква.

Аялрин бахча кардик акатун па­тал герек документар туькIуьру­нин, анаг республикадин бюджетдик кутунин, пешекарар, гьакIни электронный нубатдай аялар кьабулунин ва маса крар куьтягьуниз талукь кIва­лах тухузва.

Энрик Муслимова  хуьре алай аямдин истемишунриз жаваб гузвай аялрин бахчадин дарамат эцигунай Сагьиб Алимоваз сагърай лагьана.

Нариман Абдулмуталибова Э.Муслимовавай аялрин бахча ишлемишиз вахкун патал герек чарар-цIарар гьазуриз куьмек гун тIалаб­на. Эхирдай Энрик Муслимова ва Нариман Абдулмуталибова мукьвал тир вахтунда аялрин бахча ишлемишиз вахкудайдахъ инанмишвал къалурна .

Абур Вини СтIалрин хуьруьн сергьятра интенсивный багълар кутунвай ва и кар давамарзавай “Паласа” ООО-дизни фена. Анал Н.Абдулмуталибова къейд авурвал, 400 миллион манатдин къимет авай и проект республикада чIехибурукай сад я. Санлай къачурла, карханада 250 гектарда цIийи къайдадин багълар кутада, ана 350-400 касдиз кIва­лахдин чкаяр жеда.

Хазран Кьасумов