Алатай гьафтеда Мегьарамдхуьруьн райондиз Дагъустан Республикадин чилерин, эменнидин алакъайрин ва алишверишдин месэлайрин рекьяй министерстводин къуллугъчияр мугьман хьанвай.
Министрдин заместитель Вадим Къехлерова, коррупциядиз акси гьерекатриз талукь месэлайрай министрдин куьмекчи Нажмудин Кулизанова, министрдин советник Мирисмаил Сеидова “Мегьарамдхуьруьн район” муниципалитетдин кьил Фарид Агьмедовахъ галаз санал агьалияр кьабулна ва абурун арзайрихъ яб акална.
Сифте нубатда абур районда медицинадин рекьяй агьалийриз хъсандиз къуллугъ авун патал гьихьтин шартIар тешкилнаватIа, гьа месэладиз килигна.
Мегьарамдхуьруьн райондин больницадин кьилин духтурдин заместитель Алзира Шириновади райондин поликлиникадин цIийи дарамат эцигунин месэла кудна. Ада мугьманриз малумарайвал, районда агьалийрин кьадар гьар йисуз гзаф жезва. Чкадин поликлиникадиз къвалав гвай районрайни начагъбур къвезва. Абурал алава яз, районда авай пограничникрин хизанризни гьа и поликлиникадин работникри къуллугъзава.
— Чун чи кеспидин везифаяр намуслувилелди кьилиз акъудиз алахъзава, амма алатай асирдин 70-йисара рабочияр патал эцигай ва гила лап куьгьне хьанвай дараматда агьалийриз еридин къуллугъ ийиз агакьзавач, — лагьана А.Шириновади. — Мегьарамдхуьруьн район Дагъустанда чIехибурукай сад ятIани, ина къени алай аямдин истемишунриз жаваб гузвай дуьзгуьн поликлиника авач.
2009-йисуз эцигиз гъиле кьур, амма вучиз ятIани акъваз хьайи поликлиникадин дараматдин эцигунар давамар хъийидайдак А.Шириновади умудар кутуна. Райондин кьилевайбуру, поликлиникадин руководстводи, коллективди республикадин органриз ва федеральный ведомствойриз и месэла гьялун патал са шумудра кхьинарни авуна. Амма…
Чна виликдай газетдай хабар гайивал, “Газпром трансгаз Махачкала” ООО-ди Мегьарамдхуьруьн райондин Филерин хуьруьн са магьледин агьалияр, “Моздок-Къазимегьамед” газдин линиядиз мукьва эцигнава лугьуз, яшайишдин кIвалер чукIур хъувуниз мажбурзавай. И месэладин патахъай хуьруьн агьалийрин са дестеди министерстводин векилар хабардарна. Абуру къейд авурвал, 15 кIвалин иесийриз чилер 1966-йисуз чара авунай. Вирида чпин участокрал кIвалерни эцигна, куьмекчи майишатарни кардик кутуна ва икьван гагьди газдихъ галаз алакъалу компанийрин патай са наразивални авачир. Ингье гила “Газпром трансгаз Махачкала” ООО-ди яш тамам тахьанвай 36 аял авай хизанрин кIвалер чукIурун истемишзава. “Эгер чи кIвалер чукIурайтIа, чаз фидай са чкани авач”, — лагьана Филерин хуьруьн агьалийри.
Хуьрелрин хуьряй атанвай Тагьир Агьмедова Муьгъверганрин хуьруьн кьилихъ Самур вацIун къерехда яд кIватIдай кьилин имарат эцигунин месэла къарагъарна. Ада къейд авурвал, селлер атайла, ци хуьруьн майишатдин суьрсет гьасилзавай чилер тухузва. Нетижада агьалийрин участокриз ва хуьруьн майишатдиз еке зиянар жезва. 2002-йисуз яд кIватIдай кьилин имарат эцигиз гъиле кьунай. Анжах къени ам эцигна акьалтIарнавач.
Винидихъ тIвар кьунвай месэлаяр республикадин министерствойрин ва ведомствойрин куьмек, иштираквал авачиз гьялиз жедайбур туш.
Гуьруьшдал къарагъарай месэлайрин гьакъиндай министерстводин векилри Дагъустан Республикадин Гьукуматдин Председателди абур гьялдай къарар кьабулун патал лазим справка кхьидайвал я.
Мегьарамдхуьруьн райондин администрациядин пресс-къуллугъ
